過去20年，香港人供樓係越嚟越易
Facebook 專頁有更多無聊短文: https://www.facebook.com/ivanliresearch/
過去20年，香港人供樓係越嚟越易。係有點反常識，但真係事實。我最鍾意寫呢啲表面違反常識但係事實嘅嘢。
香港人供樓，其實冇乜壓力。唔好畀啲咩 「樓奴」 「為層樓放棄青春」嘅講法誤導你。
你以為供樓嘅人好似你想像中咁輕鬆？不，佢哋有幾輕鬆，你想像唔到。
政府早兩日發表咗第一季經濟報告，傳媒留意嘅，不外乎兩樣嘢。第一，香港第一季經濟增長，4.7%，2011年嘅新高．
更有趣嘅係，就係關於供樓。
「市民的置業供款負擔比率，進一步惡化至71%，遠高於過去20年長期平均水平的44%。」
我篇文已經寫過呢個東西（供款／入息比率）有幾脫節
問題係，我城躁動就叻，思考就零。好多人見呢個圖就演繹為「香港人七成收入拎咗去供樓」， 「遠超過過去廿年平均值」 「供樓越嚟越辛苦」（見到自2004年左右條線一路升嘛)。真的嗎？
What if 我話你知第時可能去到超過100？即係唔使食唔使飲都拎去供樓？仲要問人借？
冇呃你，政府話「假如利率上升3個百分點至較正常的水平，該比率更會急升至93%。」
而利息升三厘，唔係不可能嘅事。
經濟日報呢個圖已經話咗你知點計，其實諗下就知有乜問題。
首先，中位數係一個問題。講負擔比率都講過，買樓嘅唔係中位數收入嘅人。
咁但，呢個都唔係最大問題。反正如果由頭到尾都係計中位數，咁應該至少同以前嘅數字可比？
就係唔得。
因為，仲有兩個假設，而不幸地兩個假設都過晒時，同現況脫節。第一係假設你借七成。比你估下而家啲人其實借幾多成？答案係五成都冇。
第二，係假設你供20年 (經濟個圖打錯字)。但而家啲人差不多係供30年。
(舊文有寫)
咁首期你估細咗，即係借嘅錢你估高咗，而還嘅年期你又估短咗。供款就梗係估高好多啦。
況且，供樓嗰啲，唔係中位數收入嘅人嘛。
金管局就有準啲嘅數字，計 OMDSR（outstanding mortgage debt service ratio ），供款佔供樓人嘅收入，呢十幾年都係十幾％。仲要一路跌緊，哈哈。
所以你講咩負擔比率（樓價／中位數收入）好高。問題係，供緊嘅人根本唔係你計中位數收入嘅人。
政府呢個供款入息比率，一樣係呢個問題。話「遠高於過去20年平均水平的44%」。但睇 OMDSR，真係計供緊樓嗰班佔佢收入幾多，答案係自1997年後一路跌緊，當時係三成，呢十幾年都係15%唔夠。
咁你話，過去二十年，香港供樓係辛苦咗定易咗？
所以，過去20年，香港人供樓係越嚟越易 — 不過，你要拎到首期借到錢先得。對於上到會嘅人，係越嚟越易噃 — 但越嚟越少人上到會。
最後嚟兩個個FAQ：邊個數準啲？我就唔會咁和稀泥講 「各有用處」。咁梗係金管局個數準啲啦。根本都冇人供廿年同埋七成首期，供樓嘅人收入亦明顯高過中位數嘛。
咁點解政府唔用金管個數？就唔知啦。當然政府做嘢梗有Agenda，話畀你哋知其實唔難負擔？其實供樓嘅越嚟越輕鬆？咪畀你屌多幾錢重。況且，講過無數次，你上唔上到車從來唔係政府或金管最關心嘅嘢。佢哋最關心係上到車嘅都係有銀紙嘅，拎到大大舊錢做首期，又高人工—總之樓價跌都唔好累到銀行就得。
順手一提，你見啲調查講「大學生中位數人工」，問題都差不多。今日嘅「中位數大學生」，同二三十年前嘅「中位數大學生」，根本在社會上嘅income percentile都唔同。以前大學生少，出到嚟係社會精英，而家只係普通人一個。你應該用當年最差嘅大學生，同而家嘅中位數比，咁先係同一個社會階層。
舉一反三，你講經濟客位，同廿年前比，啲餐越嚟越難食，越黎越窄，越嚟越雜。係好合理的。因為咁多年通脹，人工加咗唔少，經濟客位根本冇加過價乜滯，甚至仲平過以前 — 所以你最好拎今日嘅Premium Economy 同 以前嘅經濟比先比較接近．正如以前坐商務嘅係貴人，而家只係好普通嘅人。根本以前坐飛機嘅就係勁人，而家就係MK仔，並不可比。
Facebook 專頁有更多無聊短文: https://www.facebook.com/ivanliresearch/
