TVB(511)業績: 好似唔大鑊,其實好大鑊,可能會死,但冇咁快
Facebook 專頁有更多短文: https://www.facebook.com/ivanliresearch
無可避免講少少政治,其實非我所願,不喜勿插。喜都好,唔好集中在嗰啲地方。
- 上次篇有線反應還好,所以繼續寫。係呀,幸福唔係必然的。寫TVB嘅嘢,基本上出面啲友,一係平舖直述(冇法,你估好高人工咩,又唔止做一隻古),一係就加咗自己啲想像,總之屌TVB就實有人讚好。
2.例如講「TVB舊年年中「得返」7億現金,而只係出糧一個月都燒1.3億。」呢啲,咪擺明引導你,以為人地真係就執笠。而讀者多數都係唔撚用腦的。好簡單,舊年年中得返7億,只係出糧都一個月燒1.3億,即係5個幾月燒完啦?咁仲有得出業績?應該舊年十二月死咗啦可?仲只係計出糧未計其他喎。咁事實死咗未丫?「未死都就死」。活地亞倫話齋,we are all dying添。
3.本人向來唔行呢套,素來以提升讀者水平為責任。其實真係用撚下腦。埃汾而家現金好似得返幾千,屌你一個月供樓都萬幾啦,未計個個星期打邊爐一千添,一個月供樓食飯都兩皮幾。咁我跳咗樓未?係呀,埃汾糧頭得返幾千現金,一個月供樓都一萬,食飯又幾千,步入倒數階段啦(其實個個由出世開始已經步人倒數階段)
4. 好,睇完啲錯嘅示範,畀啲堅嘢你。業績下話。就下面咁,我就勸你唔好去睇原本嗰份嘢了,都幾複雜。其實以一間都咁多業務嘅公司嚟講,TVB啲數唔算太難睇,奈何之前不務正業搞咗堆咩「星美」嘅東西,就很煩。唔止係搞衰,有時係掉轉,令你以為只係因為星美衰佢先衰,睇唔到真正嘅問題。
5. 講多少少,呢段好重要,你可以copy低去第度先。公司買咗兩隻「星美」既債,一隻係隻23球美金(港紙1.8億)嘅定息債,以下就咁叫「星美債」,另一隻係可換股債券,CB,83球美金(港紙6.5億),以下就叫「星美CB」。咩係CB,睇舊文,唔解,不過而家都不重要,基本上兩隻都真係變廢紙,最新已經write off 晒。下次唔使再見到
6. 嚟啦喎,星美嗰堆嘢,在18 19呢兩隻業績全數打晒靶,8.3億兩年就咁冇撚晒,真係極其戇鳩。但反正股票睇前景,鞭屍講管理層不知所謂(事實係),大把文寫過。而家只講對業績同將來嘅影響。你見到嘅係,首先隻星美CB,6.5億,18年減值咗3.2億,19年(下半年做的)減值咗3.3億,變零,樓上星美CB一行見到。再上面一行,「金融資產減值&星美債」,煩啲,因為有其他嘢。簡單嚟講,星美債嗰1.8億,2018年已減值晒。你話,喂,明明2.3億喎。咁因為仲有其他嘢,正如今年仲有,但「幾千萬咁濕碎唔好計」
7. 幫大家貼多次個表,同上面一樣的。勾咗呢堆乜嘢星美出嚟,你見到有一行叫做「唔計星美」嘅東西,我計出嚟,公司都有提呢個數。仲有一個叫做哥牙易必打嘅東西,core EBITDA(唔知易必打係乜又係睇舊文),其實官方好似叫兀質時突易必打,是但。即係唔計星美又唔計稅呀折舊呀攤銷呀利息呀咁嘅核心「盈利」。冇問題的,好多公司都會公佈呢啲數。
8. 做咗呢啲,就好易睇了。官方講話19年「核心業務」賺錢,冇錯喎。留意唔係講哥牙易必打,易必打唔係賺錢,唔好咁狗,下個月你拎啲易必打去交租丫。係講「唔計星美」,3500萬盈利,好過冇,叫做打平。咁好似唔係幾差啫?
9. 問題係,其實再之前一年(18),「唔計星美」,你賺成3億喎!即係個核心業務大倒退的。如果只係睇頭條,「蝕兩億變蝕三億不過其實我主業賺錢」,就睇唔到咁大件事了。而就算你睇個哥牙易必打,都係按年大跌的,7.8億跌到4.6億。
10. 仲有更大問題係,19年下半年比上半年差好多。公司19年上半年業績,其實唔太失禮,有2億賺喎。雖然long住個星美炸彈響度,但都不過3.3億,痛還痛,一次架啫。但下半年就大檸樂啦。你睇返下半年,「唔計星美」,公司蝕1.8億,貨真價實,而上年年賺緊2.2億喎(計唔計星美都一樣,上半年冇呢啲東西)。計哥牙易必打,仲大劑,下半年蝕,上半年賺緊5億。乜料?
11. 咁唔使佛地魔唔敢講,大家都知,下半年係咩事。反送中嘛。的確見到抽咗好多廣告,你睇第一行個收入大跌就知。有話係經濟唔好?又係事實,但大家知廣告筆直嘅嘢,好多時唔係話抽就抽,經濟唔好都要滯後啲先見到。證據?你見NOW,VIU同有線,下半年並冇特別比上半年差的。所以呢度的確見到反送中好大影響。你見到咩提爆中銀或者燒佢機,純係感情宣泄,對拖低人地公司冇乜影響。但杯葛TVB(或者叫啲公司唔好落廣告)嘅影響係大的,又夠文明,合法,冇破壞財物。啱我呢啲和理非(純技術分析,不構成任何建議,而其實我N咁多年都唔睇TVB,應該話我係唔睇電視嘅,我屋企個有線壞撚咗成年我先整,公司應該多謝我個個月白畀錢)
12. 咁只能講句,上年下半年好大鑊,今年上半年更大鑊。抽嘅廣告係咪抽晒?應該未必,都話有啲一早落咗筆直,但到期就可以唔續,續都可以壓價。況且,仲有全人類都影響嘅,肺炎。呢個乜台都死。今年中期見真章,下半年應該都好難睇。
13. 咁但,死還死,七孔流血還七孔流血。大鑊還大鑊,同執笠呢,都仲有啲距離。國泰(293)上個月一個月就蝕咗20億添。一個月喎大佬!雖然國泰規模(計book value)差不多係TVB十倍,但,國泰一個月蝕20億喎!等於TVB一個月蝕2億,而現實TVB一年先蝕幾億。希望明我講乜。至於有線甚麼,得幾億book ,一年就蝕幾億,應該呢刻已經班緊水(其實冇一刻唔係班緊),隨時死。所以,要執笠有排未到TVB
14. 點解TVB唔使死住?因為底子厚,正如我在明報文講(篇文主要講王維基):爛船三斤釘,長遠可能都係死,但短期,兩三年生存不成問題,祖先生性,剩下大把家產慢慢敗,其實如果正正經經做膠劇唔去買乜鬼債券唔使蝕咁快。但無論如何都係嗰句,心田先祖種福地後人耕,生生性性拍下膠劇,投下共,玩多幾年冇問題,甚至唔使咁快集資—屌你,TVB今年仲有息派呀(居然有人以為蝕錢唔可以/唔會派息,其實你諗下,既然賺錢可以唔派息,蝕錢當然亦可以派息)。
15. To be more precise,你睇TVB,十鳩幾億現水(係喎,唔係蘋果篇文話人地年中得七億出糧一個月都一億幾咩,做乜年尾又有十一億?),貸款先得廿幾億。你睇個叻基牙寧,即係net debt / equity ,根本仲健康過往年。因為減咗債。留意個equity仲要大縮咗水喎,一年唔見咗7億,除咗因為蝕錢亦因為派息,蝕住錢派息就係咁架啦,祖蔭大把。舊年下半年,TVB唔計星美,蝕緊1.8億。咁我當之後年年蝕夠5億,都點都頂到四五年起碼。
16. 唔好同其他行業比,但TVB嘅叻基牙寧先廿個巴仙,相當健康,健康過陳健康—而有線講緊係68%—除非有線債主隻CB換股啦(我有理由相信有機會炒高佢)—換咗股個叻基牙寧咪低,但股價照樣大跌,因為大手攤薄。
17. 未來?我都唔知有乜未來,我甚至唔知呢個城市有乜未來,或者我有乜未來,只係知山本未來(OK,好爛)。但勉強睇下。我估,都係投共有前途,once you go red never go back.有線都要投共(中移動),正如玉女(玉玉地啦)都下海,咁一早已經露點嘅TVB真係唔爭在啦,對不?一件污 二件穢 三件無所謂,你班友成日講易地而處,你代入公司嘅角色諗,根本就唔使點諗。
18. 睇返個收入碧丹,主牌TVB當然係最大舊,但亦跌得好快。My TV Super一樣唔多救到。大台網(迫迫青奴呀)太細。你見到其實最有希望嘅,反而係節目發行分銷,即係海外嘢(發行分銷,唔係海外收費電視)。
19. 咁當然,收入乜都假,睇埋利錢(留意呢個同大數嘅純利唔一致,但大約有個迫劈廚咁咯),屌你,你睇主牌下半年蝕到仆街的,而呢度係—未 計—星—美—債—券—的。你話大唔大鑊?但你見到了,迫迫青奴真係幫唔少,恥笑還恥笑,照計都係第時發展重點之一。樓上講嘅節目發行分銷,下半年都係跌好多的,公司好似有講過同大陸有關,但我懶搵。
20. 你問我啦喎,好難有得搞的,電視媒體本身已經係食蕉(都話根本NOW同VIU夾埋應一年蝕廿億,有線就大家知),無線原本老本大把,但時也命也撞著反送中。點睇,主牌嘅cost 都會大減,止咗血先。迫迫青奴可能有得玩下,但短期唔會撐得住成間公司。最簡單,應該都係在個 節目發行分銷度著手,即係,奶多啲共咯,如果人地肯畀你奶的話—喂,呢個世界真係有人以為自己肯奶就得架。共唔共都好,呢個世界肯賣屎忽嘅人多,有價嘅其實都唔係好多。所以你係賣緊嘅,都應該感恩。我是十分認真的
21. 至於買唔買得過?痴撚線咩,睇完篇文都仲要問?
22. 無聊亂諗,其實無線一早應該搵王維基救亡。唔係發神經,其實王維基冇你想像中咁反共,至少當年唔係(而家唔知),都話當年佢係政協,近近地,佢支持填海支持開郊野公園。你諗下,當年佢搞電視時,一早講明唔做新聞,你話為乜?鬼唔知做新聞又型又過癮,但就係令阿爺安心。你見成件事佢都只係啄住梁振英一男子,從冇提升到去反中嘅層次,應該係想用返阿爺去夾梁振英。當然事隔咁多年佢再點諗就唔知。而現實係佢而家搞網購開始見收成,就唔再會同你癲啦。所以都係我呢幾個月反覆講嘅,王維基執返身彩,當初如果搞到電視,而家應該好頭痕。
Facebook 專頁有更多短文: https://www.facebook.com/ivanliresearch