「我話咗㗎啦」呢句嘢乞人憎嘅程度同「第時你就明」絕對不相伯仲。呢兩句嘢可以話係 trashtalk 界嘅哼哈二將。
我諗大家人生唔多唔少都有聽過呢句嘢,喺你遇到麻煩之後,甚至係喺你真係出事之後,偶爾就會有位唔知係攞彩定贈慶嘅仁兄出嚟講啲咁嘅嘢。你話佢哋有心揶揄你都仲好啲,最難頂係有啲人係真心覺得自己係為你好,嗰下都真係唔知講咩好。
首先我哋先定個前提先:當有人講呢句嘢,基本上都一定係有啲差嘅嘢發生咗。除此之外應該係唔會有人咁講嘅,如果有,應該呢個人個判斷力有啲問題。而喺咁嘅前提下,呢句嘢係有幾個問題嘅:
1. 無視聽者感受
其實基本上大部分禁語都有呢個問題㗎啦,但呢句喺呢方面係特別嚴重,大家諗下我哋個前提:我哋係有事發生咗㗎喎,心情好極都有限啦下話。喺咁嘅情況下會咁講嘅人明顯係完全冇諗到聽嗰個嘅感受嘅。可能有人會話,「喂唔係喎,咁我真係講過㗎嘛,佢又唔聽。」可能真係咁,可能你真係恨鐵不成鋼,但咁又點?你都係無視咗聽嗰個人嘅感受喎。當你一決定咁講時候,你就只不過係宣洩緊自己嘅情緒,唔理你係恨鐵不成鋼定係無眼睇。乜聽嗰個真係想會聽呢啲嘢咩?特別係當已經有啲差嘅嘢發生咗時,其實佢仲有冇咁嘅 capacity 去應對你講啲咁嘅嘢呢?
2. 難以回應
呢句嘢同「第時你就明」一樣,當你聽到嘅時候你係根本唔知可以點應㗎:「無錯啊,你講得好啱!」「我真係好後悔冇聽你講啊!」「我知錯啦!我以後唔會咁,一定會奉你講嘅嘢為金科玉律!」唔通我咁應咩?基本上你除咗硬食都冇得點回應。唔好睇少呢樣嘢:溝通就係(起碼)兩個人之間嘅互動交流。留意返,係「互」,正常嘅溝通係應該要有雙方嘅參與㗎。既然係咁,你講一句對方冇辦法接嘅說話啫係無心溝通啦。溝通就係要好似搓波咁,互相就住就住 set 俾對方嘅。下下往死裏打嗰就係比賽啦,廣告對白話「贏咗場交,輸咗頭家,值得咩?」其實就係講緊呢樣嘢。
3. 無助件事
呢樣我諗好明顯啦。當一件事出咗問題,我哋第一步要諗嘅應該係我哋可以點做去令到件事唔好再惡化,減少我哋嘅損失。喺呢個時候,其他嘢都不過係旁枝末節,執着嚟都冇用。講到呢個位就諗起大學嗰陣有個教授講過佛教嘅毒箭喻:
猶若有人身中毒箭,彼親屬慈愍之,欲令安隱、欲饒益之,求索除毒箭師。於是彼人作是念:『我不除箭,要知彼人己姓是、字是、像是,若長若短若中,若黑若白,若剎利姓、若婆羅門姓、若居士姓、若工師姓,若東方南方西方北方誰以箭中我?我不除毒箭,要當知彼弓,為是薩羅木、為是多羅木、為是翅羅鴦掘梨木?我不除毒箭,要當知彼筋,若牛筋、若羊筋、若氂牛筋,而用纏彼弓?我不除毒箭,要知彼弓弝,為白骨耶、為黑漆耶、為赤漆耶?我不除毒箭,我要當知彼弓弦,為牛筋、羊筋、氂牛筋耶?我不除毒箭,要當知彼箭,為是舍羅木、為是竹耶、為是羅蛾梨木耶?我不除毒箭,要當知彼箭筋,為是牛筋、羊筋、氂牛筋耶,而用纏箭耶?我不除毒箭,要當知彼毛羽,是孔雀耶、為是鶬鶴耶、為是鷲耶,取彼翅用作羽?我不除毒箭,要當知彼鐵,為是婆蹉耶、為是婆羅耶、為是那羅耶、為是伽羅鞞耶?我不除毒箭,要當知彼鐵師,姓是、字是、像是,若長若短若中,若黑若白,若在東方若南方若西方若北方?』彼人亦不能知,於中間當命終。
——《佛說箭喻經》
無錯啊,當有人出咗事就係好似係中咗毒箭咁,你唔係諗點幫佢解毒,反而喺度講咩「我叫咗你唔好企喺度㗎啦,好易中箭㗎嘛。」啫係有心玩嘢想佢死啫。雖然唔係每個問題都咁急切,但早一秒諗到/下決定做咩總係好啲嘅。其他嘢就留返事了之後再慢慢講好過啦。
4. 強調自己做咗嘢
呢樣係呢句嘢嘅死罪。我唔知大家點睇啦,但呢句嘢俾我嘅感覺就好似聽緊「職場卸膊操」咁:「嗱我做咗嘢㗎啦,咪賴我啊。」好似要先發制人咁講自己有做嘢去避免俾人話佢做咩唔早啲制止對方犯錯。而家冇人追究你喎,點解要咁強調自己已經做咗嘢呢,特別仲要喺呢一個事情仲未解決嘅時刻。係咪應該 focus 喺點樣幫到件事度會好啲呢?而如果你真係有需要咁講,唔係聽嗰個會指責你嘅話,你係應該直頭遠離嗰個人,因為佢將自己人生嘅責任放咗喺你度;但如果對方唔係一個咁嘅人而你都咁同佢講嘅話,咁你必須承認,對你嚟講,對方下錯決定遇上問題嘅需要係比唔上你先前講嘅意見俾忽視嘅失落或委屈,又或係比唔上你呢刻想宣洩情緒嘅慾望。我並唔係想指責呢一樣嘢,我亦唔覺得咁樣係錯:每個人都有 prioritize 自己生活中唔同人或事嘅權利。但我會覺得如果係咁嘅話,可能你直頭唔好再花時間喺對方身上會簡單啲,對大家嚟講都可能會係一件輕鬆啲嘅事。
正如上篇一樣,指出問題固然係好,但更重要嘅係可以點樣去改善:否定一樣錯嘅嘢,仲有萬千樣錯嘅嘢;但肯定/做一樣啱嘅嘢就已經喺同時否定咗千百樣錯嘅嘢。
1. 首先了解人哋係咪需要你「幫」
大家可能會以為喺啲咁嘅情況第一時間要做嘅就係俾意見。錯啊!喺上次篇文我哋就講過呢樣嘢。(未睇嘅去睇下啦,笑。)
「先問應否,再問如何」,喺俾建議人之前首先要諗清楚對方係咪真係想/需要人俾意見佢。
而喺今次情形上,由於對方已經係面對緊一啲問題,我哋應該要分兩步咁去做。首先,問下對方想唔想講件事先。如果對方根本提都唔想提嘅,咁直頭咩都唔應該講啦;下一步,係問下對方到底係想要「安慰」定係「解決方法」,了解對方當下嘅需求而唔係一味講自己想講嘅嘢;最後,先係真係根據對方所需要嘅嘢去講相應嘅內容。畢竟我哋嘅目標應該係想對方好,溝通/講嘢都只不過係我哋嘅方法嚟,因住對方需要乜再做先係正道。
2. 喺適當嘅時候再反思
我都明有時係真係會好恨鐵不成鋼,嬲對方當初冇聽到自己嘅意見,但事情呢刻已經發生咗,而亦好大機會係未解決嘅,就算你再抌心口都應該留返更加好嘅時機先。唔係話反思唔重要啊,反思先正正係我哋所經歷過嘅嘢令我哋有所改變嘅主因。單純嘅經歷係中性嘅客觀事實,我哋需要覆盤反思去分析返自己到底有咩做得啱有咩做得唔啱,咁樣先會有進步。但,正如上面毒箭喻咁,解咗毒醫好咗佢先再慢慢反思啦。至於咩係適當嘅時候,就要睇個問題解決成點,對方嘅情緒同狀態如何再作打算啦。
3. 少啲怪責多啲關懷
除咗時機外,我哋嘅情緒都應該要控制好。我一直相信每個人下嘅每個決定已經係佢當刻可以下嘅最好決定。我哋應該尊重並且相信對方具有正常嘅思考能力,而喺佢當初下決定嘅時候背後可能仲有好多唔同嘅因素要考慮而佢未必會全部拎晒出嚟講。咁佢唔會刻意攪禍件事㗎嘛。如果對方都已經盡咗力,怪責其實真係冇乜用,不如多啲鼓勵同關懷。(突然好似啲政府廣告咁 lol) 同埋又咁講啦,事後睇就梗係覺得自己條橋好啲啦,但真係做嘅時候有邊個知到底會點?話唔定佢跟咗你講仲衰呢?
小結
「你第時就明」同「我話咗㗎啦」一個係對未知嘅未來嘅莫名定論,一個係對無法改變嘅過去嘅事後孔明,但相通嘅係嗰種高高在上嘅嘴臉。好多時啲咁講嘢嘅人並唔係唔識咩溝通技巧 —— 佢對住老闆同啲客分分把口叻過你同我 —— 佢哋不過係唔覺得你係需要佢咁認真用到呢啲技巧去溝通嘅人。真係要時刻提醒自己唔好有意無意間就變到咁乞人憎。
後記
呢排趁放假得閒啲就寫下嘢,本身諗住三日前就寫完,點知拖拖下又幾日 lol
寫到咁上下先發現「無視聽者感受」係會有歧義 lol 唔係海倫凱勒嗰隻啊,係無視//聽者//感受。希望大家睇嘅時候冇覺得奇怪啦,但個腦真係卡咗諗唔到點改好。
寫到尾嘅時候,本身覺得好似要整返啲套語名言(考試訓練嘅遺毒掛),本身諗起「我評斷一個人的品格,不看他如何對待比他地位高的人,而看他如何對待比他地位低的人。」,一查,見到係一位我唔太中意嘅作家嘅作品入面引自 Mark Twain 講。對呢啲引上引嘅句子始終有啲保留,所以都諗就咁作罷算,但跟住就見到「臨下驕者事上必諂」呢句。但我再三思度,好似講呢件事出嚟仲有趣過用呢句嘢,所以就係咁了。