［美股業績一分鐘］蘋果升，Alphabet跌。但仲有樣嘢叫透明度
Facebook 專頁有更多無聊短文: https://www.facebook.com/ivanliresearch
蘋果出完業績後勁升，市值上返10000億美金。Google 母公司 Alphabet（其實幾時先唔使講咁長？）出完業績就大跌，跌8%
兩間公司都好多業務（特別係Alphabet），多人講多人識，大把專家分析，所以唔講太仔細了（特別係Alphabet，反而蘋果可能我都講幾句）。
固然完係唔同嘅公司，冇可比性，但今次Alphabet有樣嘢畀人鋤得特別勁
你睇下附圖，兩間公司嘅業績，Apple to Apple，I mean Apple to ……Alphabet。冇一份拎Powerpoint一份拎PDF，兩份都官方嘢。
見唔見到最大分別在邊？係碧丹呀小朋友
蘋果嘅財報，分得相當清楚。收入產品幾多，服務幾多。成本拆開R&D幾多，其他幾多。仲會話埋畀你知每個地區收入幾多，每個產品幾多，埃瘋幾多埃劈幾多埃覓幾多。
縱使有啲tech撚覺得蘋果（特別係教主未死前）control freak，封閉系統。但在財務報表方面係相當公開嘅。人地10000億美金市值，你吹呀？你間公司有冇丫?串撚到話「我成條街買起你拆咗你個鳳凰會用嚟打乒乓波都仲得呀」嘅Facebook先得一半多啲（講呢句嘢時更加差得遠）
Alphabet呢？冇乜喎。全部集埋一大舊。收入呢，就咁叫Google廣告收入，Google 其他收入，同埋other bets，that’s all．冇呃你，後面啲footnote都冇，我睇撚晒（好短啫）。連earnings call有人問都冇答（係，我睇晒，有transcript嘛）
廣告，係咩廣告呀？幾多係Youtube？唔知。Google 買左Youtube 13年，但Youtube貢獻幾多盈利？佔收入幾多？係賺係蝕？一概唔知。
好啦，硬件呢（有手機嘛）？Android呢？雲端呢？Google Pay呢？得一條大數，叫「其他」，你自己估。一般認為雲端同Google Pay增長好，抵消返硬件輸錢，但幾多？冇人知。
問點解舊年第四季咁好今季走晒樣？答案係：好難比較。
當然，谷粉或果黑可以挑機，講三樣嘢
第一，叫做臭蟲，蘋果都係咁。的確如此。蘋果一樣冇攤開畀你任睇（有邊間公司會？）。iWatch賣幾多，蘋果從來唔講（可想而知認真麻麻）。同樣地，蘋果上次（定再上次？）業績已經話唔再公佈埃瘋銷量。亦擺明係因為知道將會賣得差。但，智商正常嘅，都應該比較到兩間公司嘅披露真係相當唔同。
第二，叫做「我一樓都係咁」。係喎，Alphabet從來都係咁，唔係而家先咁不透明（相反蘋果之前都有出埃瘋銷量，所以忽然叫停咪股價插，而其他牌子差不多全部都唔會講，小米就好似會）。
第三，甚至有人話，老撚奉架？又真係唔係老撚奉。真喎，上市公司冇法律或道義責任去披露任何細節。理論上只需要出份會計報表有收入有利潤有派息就得。係真架喎。你可以earnings call都唔開架（應該可以）。
但投資者分析員一樣唔係老撚奉要理你。得，你咪唔好講，我咪唔買，沽你貨，唱淡你。你冇所謂就得。係喎，唔記得公司仲要係同股不同權，其實吹啲管理層唔脹的（蘋果就冇呢樣嘢，所以教主先會畀人炒）
事實呢，就同空姐拎飛機上嘅嘢，或者寫字樓同事偷文具，或者供應商啲回佣一樣。冇事還冇事，好地地梗係冇人理，你開公數去夜總會叫雞都得（以前大把投行可以）。但有事要搞起你上嚟，就梗係咩都有問題啦。
同樣道理，你Google業績好時當然冇人理呢啲嘢—但你而家就係業績唔好嘛，咪會畀人插。唔鍾意嘅，私有化咗佢，自己公司，任你點玩。日日在Doodle叫基金經理仆街，hidden game 係扑傻瓜咁打鳩分析員都得，乜都得，你唔上市就得。
但你係上市公司嘛。Public fucking company，you know?
利申：純技術討論，絶冇打算話蘋果as a whole 好過Alphabet。兩間公司股票我都買過。而我覺得現價嘅Alphabet好似應該OK抵買。亦都冇人話高透明度就股價會好啲。但蘋果近排股價的確仲係跑贏。
