心理調適，唔好移左民先想返轉頭(I)
本來係會講生活成本：租屋同VISA，但反觀過去香港多事6月，都係講啲心理相關嘅野。同時希望喺香港嘅，不論係BNO定係申請唔切BNO嘅人，唔好死。
移民既心情其實唔比2019年嘅6月既香港差，有啲人會話「只要唔係香港，邊度都得」。就算俾你嚟到英國，除咗搵工優先嘅困難（可能脫鈎之後唔係咁），你可能仲會面對一啲生活上嘅困難；而肯肯定你係從未想像過嘅。所以心理質素一定要好。異星人住喺倫敦（咁講其實幾怪），而因為國際公司好多都係倫敦，倫敦係比較多人開始工作嘅地方。以下主要適用於倫敦
我個人見到其他人加上自己遇到就有以下尼幾點：
- 食野口味唔同
- 空間感
- 無力感
- 速度感
- 衛生程度
- 語言包容
- 俾人呃
- 搵錢少咗好多/錢洗多咗好多
- 生活質素低左
- 離香港好遠
- 冇前途冇出路
- 食野口味唔同
尼個原因雖然人人不同，但香港人去過好多地方，或多或少對他國都有啲認識。可惜香港人去親都唔係生活，係旅行，甚至特登攞個BNO身分去！其實去旅行，俾多左錢唔緊要，俾人昆唔緊要，日日食唔好唔緊要，因為，你仲會返屋企 — 香港。移民就即係喺屋企俾人呃，屋企食得唔好！但係又吹佢唔脹，一時三刻真係無乜出路。
好多人口胃唔同，異星人就無乜所謂，我日日食西餐都得。有啲人一要食中餐，甚至最少1星期都要食一次飯。係英國食中餐，買食材困難，因為咁遠水路運食物過來賣又加上個入口量唔大，一定會貴過香港，就等如你喺香港都唔會日日去Citysuper買餸啦。再講，出街食係好貴，下次再詳細講（又下次？！）。PS 日本野食重貴
當去到冬天，一打邊爐就無肉片賣，要自己切。一係就去華人超市買，或者貴價日本超市（其實個樣望落同Three Sixty差唔多，但係收得重貴過Citysuper）。作為要打邊爐嘅華人，唔通真係要去"海底捞"？慘！
- 空間感
外國空間特別大咁，其實尼個係美國先可以咁講。英國同香港差唔多，屋細，舖細，馬路細。雖然屋都係大過香港，但唔係大好多，如果你租房的話（真係1間房，唔係大陸/英國嘅中文叫果種租房)，都係150呎左右。其實差唔多。
題外話，大多屋企嘅廁所，係無地台去水位架！！！咁點洗地呢？等佢自己乾。。。
馬路就真係窄，一條雙線行車嘅馬路可以有左右同時泊左架車，即係你要好小心對面來既車，究竟讓定唔讓，係個好大既問題。
好似左圖咁重要係合法泊車，有啲位重會有巴士經過。揸車揸到好危險咁，係倫敦1區同2區尤其嚴重。
寫寫下又越寫越長咁，下回分解……BTW,今日尖沙咀百萬行，如果有去嘅你，希望你玩得開心！（咁似海洋公園🤣）
你可能有興趣睇埋（呢篇文有提到嘅文）
