又跳一跳，出篇巴黎遊記先。柬埔寨嗰啲遲下繼續。「Sorry啊…我未問你就自把自為book咗住宿。你會唔會唔高興？」
「唔…俾我睇下你book咗咩地方？」
法仔有少少唔好意思，將Airbnb嘅訂房確認轉發俾我。我打開Airbnb app，將啲相碌咗一次，再從頭到尾，逐張放大，睇多一次。
「好靚啊！係我鍾意嘅類型！好多窗啊！採光好好！」聽見我咁講，法仔鬆一口氣：「Saint-Germain-en-Laye呢個地方幾靚咖，曾經係路易十四嘅首都。呢度有城堡啦、宮廷後花園啦、森林花園啦…」我興奮咁打斷佢：「我已經Google埋喇！個花園好大好靚啊…我可以喺入面散步同慢跑！」「我哋間Airbnb位置都幾好咖，喺呢區嘅大街，附近商舖一應俱全，好方便咖。」
於是，我哋喺Saint-Germain-en-Laye呢條大街Rue du Vieux Marché住咗兩個禮拜。
最後一日，我送咗法仔返公司之後，自己慢跑返Airbnb，沖個涼，執好行李，等房東返嚟收鎖匙。
我打開廳嗰兩隻大窗，留戀街上嘅風景。
對面有間酒紅色舖頭，exactly係burgundy呢種酒紅色，上面掛住橙黃色大楷品牌名「NICOLAS」。招牌穩重得嚟不失霸氣，配色含蓄典雅；本來想形容為英倫風，但法國人聽親「英」字都會皺眉，我諗法仔唔會想聽到我咁樣形容一間法國公司。
Nicolas係法國著名零售酒舖，國內閒閒地五百間舖。法仔帶過我入去買酒，淨係一紅一白都物色好耐，捉住店員問長問短。佢聲線本身已經溫柔，講起法文上嚟零舍動人。我偷偷地錄咗十零秒佢同店員嘅對話，聽唔明都可以J下。話晒long distance唔易捱，得閒重播下佢把聲都可以解下相思之愁。
Nicolas隔一個舖位係Picard，望落只得Nicolas一半面積。淺灰底色配藍色細楷品牌名「picard」，風格比起Nicolas摩登得多，嗰種冷色調甚至令我聯想起太空。住喺呢度頭幾日，法仔晚晚都問：「有冇去到Picard？入去睇下啦，好多嘢急凍食品賣，幾好食咖。」我唔敢自己入去，怕店員用法文招呼我，我會應對唔到，面懵遁逃。
有一晚，法仔放工返到嚟，雙手放喺身後，神神秘秘，似係有驚喜俾我。我好奇咁裝一裝佢收埋啲咩，佢得戚咁揚一揚手上扁扁地嘅正方形盒。雖然我唔好朱古力，不過佢有心氹我都抵錫，原來法國人真係幾浪漫。點知接過嚟一睇，盒上面寫住「12 Escargots de Bourgogne」——係蝸牛，佢買咗我從未食過嘅蝸牛，想氹我試食。嗰晚我一路食呢份禮物，一路笑佢之前將「蝸牛（wo1 ngau4）」誤讀成「和牛（wo4 ngau4）」。法仔個靦腆樣好鬼可愛。
再過幾個舖位，係Yves Rocher。法仔知我偏好天然有機產品，出親街路過Yves Rocher，都會嗌我入去睇下。Yves Rocher嘅品牌色係草綠色，令我諗起Body Shop；我好唔鍾意香港Body Shop陣味，感覺好假。對於保養身體髮膚完全唔在行嘅我，從來未聽過Yves Rocher呢個牌子，更加唔知道佢早就打入香港市場，仲有成廿幾間分店。法仔每次叫我入去行，我都耍手擰頭。佢話佢媽咪都係Yves Rocher用家，我更加覺得莫名其妙。佢媽咪七十幾歲用Yves Rocher，佢走嚟介紹俾三十歲嘅我用？我同佢媽咪嘅護理需求，喺佢心目中係一樣？
我結果都喺臨走之前嗰個週末，跟法仔入咗Yves Rocher揀手信俾幾個女性朋友。買完之後，法仔笑：「叫親你去買嘢都話『唔要唔要』，最後咪又係喺入面揀咗成粒鐘。」「我唔識睇法文係揀得耐啲咖啦！有揀到成粒鐘咁耐咩…係咪悶親你？」「唔悶唔悶，你買到嘢咪幾好。」我有理由相信，佢喺Nicolas花嘅時間，同我喺Yves Rocher逗留嘅時間不遑多讓。
對面街承載咗我哋回憶嘅舖頭，係得呢三間。喺我哋所住嘅公寓呢一邊，回憶都唔少。窗口望出去望唔到，我都可以一一細數。
我哋住喺眼鏡舖樓上，出入要爬三層樓梯。由客廳嘅大窗望出去，左手邊剛好係隔籬戲院嘅大招牌，擋到正一正。戲院喺得我哋隔籬，可想而知我哋呢條街就係呢區嘅中心，人流最旺。呢間戲院規模估計同豪華戲院差唔多，但就冇咁噏耷殘舊。放映場次唔少，至少我哋每晚臨瞓前都聽到啲雄偉音效，個影院感覺近到喺正隔籬房咁。
法仔都有諗過同我入場睇戲，不過佢話呢區消費指數偏高，而且佢最愛嘅《星戰》未上映，結果佢只係晚晚捉我陪佢重溫舊《星戰》。我哋睇一集《星戰》都要分幾晚，因為睇親我都瞓著覺，自己都有啲過意唔去。直至有一晚，法仔帶我同佢一對couple知己去酒吧飲嘢，提到我陪佢睇《星戰》。男知己碌大對眼話：「你就好啦，佢一集都唔肯陪我睇。」女知己聳聳肩，一臉唔在乎咁話：「我先唔要睇《星戰》，佢陪我睇《哈利波特》就差唔多。」嗰一刻，我先知道唔係得我一個女人頂唔順《星戰》。Yoda同Chewbacca好盞鬼，但電影整體我都係唔識欣賞。
戲院左手邊嗰段路，我幾乎日日行，因為麥當勞同Monoprix就喺街尾。由戲院行到去超市Monoprix，大約五分鐘路程，中間會經過書局、郵局、幾個肉檔、幾個菜檔、幾間麵包舖、幾間時裝店、幾間銀行…
呢條街充滿燒雞味，皆因賣燒雞嘅肉檔喺五十米之內就有三間。每日落街，都會見到一排排燒雞喺烤架上面轉呀轉，雞油一路滴落爐底嘅薯仔度。法仔對金黃色嘅燒雞同吸盡雞油精華嘅薯仔絲毫不為所動，但係每次我哋經過，佢都會笑住問我到底係咪好想食。我諗我嘅眼神出賣咗我好多次。
跑les 20km de Paris之前嗰晚，我終於同法仔講：「不如我哋買隻燒雞返去食丫？我仲想食薯仔呀，今晚要食好多碳水化合物。唔係我大食，係跑長跑之前確實要『加碳』咖！」法仔拖住我去肉檔，同店員講咗一大堆嘢。我靠聽零星單字同睇肢體語言，知道佢大致係同人講：「我女朋友聽日要去巴黎跑步呀，成二十公里！俾多啲薯仔我哋啦，再多啲丫。多啲都唔怕，佢要食薯仔呀。」我唔係好明點解佢要周街話俾人聽我要跑二十公里，但係見到佢眼神流露出嚟嘅雀躍同自豪，我覺得好鼓舞。
再行遠啲，過多兩個街口，有間叫Yves Thuriès嘅朱古力專門店。法仔話佢都唔認識呢個品牌，但係當佢望見門口標住「Meilleur Ouvrier de France（法國最佳工藝師）」，就執意入去睇下。佢壓低把聲同我講：「Meilleur Ouvrier de France係一個非常難攞嘅頭銜，佢哋可以兩度獲獎，一定好有料。」
同大部份餅乾甜品舖一樣，Yves Thuriès店員會主動俾我哋試食。法仔翻譯店員嘅介紹，話俾我知Yves Thuriès有自己嘅可可莊園，佢哋其中一部份朱古力，都採用咗自己種嘅可可豆。我聽到呢一度，即刻大感興趣——我假假地都係半個咖啡師，可可同咖啡好似，講究產地，推崇「from-seed-to-table」。法仔唔明白點解我淨係買單品黑朱古力，我亦無視佢精挑細選嗰十粒八粒造型花巧又有餡嘅朱古力。佢買嗰十粒朱古力一啲都唔平，嗜甜嘅佢覺得好值得。我望到佢袋戰利品，先入為主咁覺得甜到漏，毫無意欲試食。其中有一粒，佢堅持一定要俾我食，我點推都推唔到。食落口嗰下，終於知道點解——係榛子，我食到榛子味，係我鍾意嘅榛子味。法仔好清楚我唔食太甜嘅嘢，但佢見我咁鍾意食繽紛樂，推斷我鍾意榛子味，特登揀呢粒俾我食。佢用心良苦，我甜到入心。
Yves Thuriès再過少少係麥當勞。喺香港抵制咗中資麥當勞一段時間嘅我，嚟到法國梗係食得就食。我一到法國，法仔就俾咗張預付卡我。佢成日提我唔好帶太多現金出街，話巴黎治安唔好，碌卡最安全。當佢同我講「我入咗一百蚊俾你用」嗰陣，我都仲未load到嗰一百蚊係講緊歐羅，而唔係港幣。我唔想用法仔錢，但係佢俾咗張預付卡我嘅好處，就係我去食麥當勞或者去超市掃貨都可以用自助機埋單，唔使對住啲收銀員指手劃腳雞同鴨講。
街尾嘅Monoprix係連鎖超市。呢間分店比較大，連家品電器都有。法仔好少同我行呢間Monoprix，佢話呢區比較中產，物價高，情願喺公司附近嘅超市托幾袋餸返嚟，好慳家。我哋唯一一次一齊行Monoprix，係同佢爹哋媽咪喺呢區嘅餐廳食飯之前；佢想揀支酒俾世伯，但係Nicolas收咗舖。佢每次揀酒都揀好耐，好有目的同要求，但往往搵唔到佢要嘅嘢。結果我哋都係喺餐廳開酒飲——法國人食飯真係缺酒不可。
目光收返嚟戲院同眼鏡舖呢邊。眼鏡舖右手邊，又有幾間時裝店，中間夾雜咗兩間藥房。
就喺我臨走前兩日，星期六，法仔陪我落街打咗個白鴿轉，就話好唔舒服，想返上樓休息。我覺得好掃興，但係都唔可能咁任性，扭佢彈起身陪我出去玩。
法仔攤喺床上面，虛弱咁問：「你今日唔使跑步？」我以為佢會期望我留低陪佢照顧佢，點知佢話：「我瞓一陣就得，你自己出街行下？」「真係？你自己一個留喺度okay？咁我去宮廷花園跑步丫！我好快返，跑一陣咖咋，一個鐘內一定返嚟！」「嗯，你去啦，去跑下步。一陣經過藥房幫我買藥，好唔好？我記得樓下有藥房，我寫藥名俾你。啲藥應該一兩蚊咖咋。」我唔知佢寫咗咩成藥名俾我，唔知係止痛定止屙，總之喺樓下藥房順利買到。嗰日下晝，佢食完我買返嚟嘅藥，再攤抖咗一陣，就叫我換衫同佢出門。
「下？去邊？你唔舒服喎。我諗住煮晚飯咖喇，你抖下啦，食得叫你。」平時煮晚飯嘅，多數係返咗全日工嘅佢。我阿媽一知道法仔病，話法仔一定係照顧我太操勞。法仔換好衫，催我：「行啦，我哋出去食。你唔好想食crêpe咩？樓下街口轉角位有一間，我帶你出街食。」我哋喺度住咗兩個禮拜，佢第一次咁認真話要帶我出街食晚飯。嗰餐飯好有約會嘅感覺，啲crêpe好好食，我滿足到極。
第二日，我先從法仔媽咪口中得知，法仔嗰晚食完飯返嚟依然唔舒服，半夜屙到九彩，而我懵然不知——淨係奇怪點解啲廁紙好似一晚少咗幾卷…
「咁就兩個禮拜…今日要check out喇…」
「係呀，你快啲刷牙洗面換衫。我最後一次送你返工喇，唔要遲到呀。」
法仔望住我，再環視間屋：「呢度都幾好住丫，係咪？」我諗都唔諗，好誠懇、好滿意咁答：「嗯！我好鍾意啲窗！」「啲窗，又係啲窗…我同你講間屋，你淨係答我啲窗。成間屋咁大，你淨係鍾意啲窗。」佢冇我咁好氣，忍唔住笑。
「咁呀…要挑剔嘅話，就係地板太多塵囉…房東根本冇吸過塵！」間Airbnb除咗多塵，仲有好多扣分位：地板起伏不平et et聲、洗衣機壞咗、熱水爐滴水、煮食用具殘缺不全、樓梯太高太窄轉彎轉到我又暈又喘…缺點數之不盡，但係幾隻大窗就足以彌補呢一切不足。
我的確鍾意窗。
大半年前，我去柬埔寨探法仔。佢幫我book住宿嘅時候，曾經問過：「你prefer酒店定Airbnb？」我當時答佢：「酒店同Airbnb都冇所謂，但係我需要窗，採光要夠。冇自然光我會死。」嗰次佢book俾我嘅酒店，唔係好高級，但係房入面有隻五六米闊嘅大窗，我滿意到不得了。嗰個景，我影咗嚟做wallpaper，用到而家。
今次嚟法國，佢未同我傾就幫我book好晒住宿。我見到間屋有咁多窗、採光咁好，隱約覺得佢將我「要有窗、要夠光」嘅需求記入咗心。
透過一屋幾隻大窗，我睇到佢嘅體貼同無微不至。透過客廳嗰兩隻大窗，我望見我同佢來回無數次嘅路、一齊行過嘅店舖。整條街都有我哋嘅足跡，好多間舖都承載咗我哋嘅回憶。
Saint-Germain-en-Laye最出名嘅，係城堡、花園同教堂。呢啲地方我都有去，但冇法仔嘅陪伴，景觀幾靚都略嫌美中不足。Saint-Germain呢個地方最令我念念不忘嘅，唔係宏偉嘅城堡、清幽嘅花園，而係處處裝滿我同法仔相處點滴嘅大街。
一條好普通嘅大街，一籃瑣碎嘅生活片段，呢度一步一舖，都係回憶。
