［印尼大莊］古靈精怪東南亞，印尼經濟增長五年最勁，但同目標比就算罷啦
Facebook 專頁有更多短文: https://www.facebook.com/ivanliresearch
彭博報導，印尼總統佐科維多多（下面叫佐科算，懶打）準備競逐連任，而印尼第二季經濟（當然係計GDP，覺得冇用或唔準嘅自己搵過第個標準）按年增長5.3%，五年最快。其實係幾好，又高過市場預期（好多人唔知個「市場預期」點嚟，有機會再解），仲撞正佢打算競逐連任，其實好到極。
不過總有啲人（例如呢篇文嘅作者）出嚟抽秤下，佐科2014年上任時，其實話個目標係達到7%，咁當然完全係做唔到。作者甚至認為，呢排因為貿易戰，美元上升，新興市場資產都被拋售，印尼經濟增長應該只會放慢。同時間佢亦一路要用外匯儲備去支持跌極都有嘅印尼盾（今年已跌6%）。基本上，佐科想達到佢講嘅7%增長，已經冇時間。任內亦都從來冇見過，6%都冇，唔好話7%。
暫時啲增長勢頭呀，消費呀，都係好嘅。但因為印尼盾係咁跌，五月央行已經加息一厘，投資銀行認為點都會減慢增長。
不過呢，到我插播了，政客講呢啲目標並唔罕見，亞洲特別多，唔知係咪亞洲人易昆。韓國上上任總統李明博，上台嗰時一樣講「747」目標，要韓國經濟增長7%，人均GDP去到四萬美金，成為全世界第七大經濟體系。埋單計下，無論點計韓國都未入到十大經濟體系，人均GDP如果計購買力平價PPP（即係計及物價，詳情可睇舊文），舊年先勉強接近四萬美金—但李明博2013年已收工。至於7%經濟增長？倒係有一年做到6.5%，但講平均就好似3%都唔夠。
同時間，台灣嘅馬英九抄到足，亦都提出過「633」，平均經濟增長6%，失業率跌到3%以下，人均GDP三萬美金。（後來有人話：結果係失業率6%，增長3%，人均GDP三萬人仔）。埋單一計，增長平均2%都唔夠，從來都冇去到6%。失業率當然亦去唔到3%之下。反而你話人均GDP呢，如果計購買力平價PPP，就真係高過三萬，而家四萬幾添。不過我懷疑講嗰啲同質疑嗰啲都未係好識分。係喎，好反智地，台灣嘅人均GDP其實高過韓國的。估唔到呢，舊文又有講。
最後補一筆嘅係，政客有咁大吹咁大就預咗，上到任話知你啦。但呢三個例子仲畀你睇到兩樣嘢：第一，其實啲統計機關都係有一定獨立性嘅（唔好做原教旨死抝咩冇絶對獨立），幾個總統都冇法點成功屈到統計機關造假幫佢刷政績。第二，其實總統要谷經濟，都唔係話谷就谷，任你想點谷衡佢為自己造勢，有時係唔得就唔得。呢個亦唔多唔少同央行獨立有關（當然中華人民共和國唔行呢套）。亦都話畀你知點解央行要獨立，唔可以淪為在任總統嘅選舉機器。
Facebook 專頁有更多短文: https://www.facebook.com/ivanliresearch
