財經術語精解: 陳德霖put
Facebook 專頁有更多無聊短文: https://www.facebook.com/ivanliresearch/
都成講樓市，但仲係要繼續講。因為你哋鍾意睇。早兩日呢單新聞有趣喎。
今日同大家介紹一個財經術語，英文叫Norman put，中文叫陳德霖put。你未聽過？正常。因為係我今日發明的。我查過冇任何人用過。他日傳媒有人用，一定係抄我。記住我coin呢個term 。
陳德霖話， 「倘確認樓市下行 可放鬆部分措施」
係呀，你睇到入去嘅標題，係 「放鬆逆周期措施仍言之尚早」。但幸好有圖有真相，我冇呃你，原本嘅題真係 「倘確認樓市下行 可放鬆部分措施」，有圖有真相。Now台段新聞亦都冇改
至於信報點解後來改咗個標題？就唔知。公平講句，即時新聞最緊要快，事後改嘢家常便飯。但唔係事實出錯，改個標題 ……都唔係冇嘅。可能編輯或更高層覺得個題唔好，或者誤導咯。陰謀論者即管可以想像 陳德霖睇到後，龍顏大怒，「做乜以為我暗示會減辣」，打去叫林行止（是但啦）改。本人就不參與呢啲討論。
陳德霖講嘅，都係官腔。況且佢講嘢一向小心，甚至唔會好似任志剛（即使在任時）咁出位。確認下行，咪考慮放鬆咯。講咗等於冇講。幾時確認當然係佢哋說了算，況且，都係考慮可以放鬆啫。
但始終個潘朵拉的盒仔打開咗，就係打開咗了。一路都唔敢太睇淡樓市，個原因就在呢度：固然大把理論家話 辣招冇用，似是而非咁講一大堆咩少咗供應樓價仲升（真係救命）。然後就用 樓價繼續升去 證明 辣招冇用
但，有冇諗過，如果冇辣招，樓價一早應該升得仲多？ 咁係咪冇用？
固然呢啲都係假想實驗，但我堅信如此。你唔信，覺得冇辣招嘅反而唔會升，咁都冇計。祝你甘心
啲乜乜負擔比率係笑話嘅原因，講過萬次。除咗香港人好很有錢（而唔反映在收入上，例如父幹），買樓嘅根本唔係中位數收入嘅人外。仲有，外地人嘛。即係，大陸人。
少講政治，但好多人以為我係一個好鍾意大陸嘅人。真搞笑。客觀事實係，大家都知，屌，大陸人自己都唔鍾意大陸啦。講乜都假，行動最實際嘛。大陸高官家人拎外國護照，錢都泊去外地，個個爭住拎香港護照，窮嘅就爭住拎單程證落嚟，對不？正如香港啲官送晒啲仔女去外國讀書，同一道理。
現實就係，你覺得香港退步，我不反對，反正呢啲好主觀。但，你心中嘅香港，可能由（whatever you like）以前嘅八十分，倒退到五十分。
不過樓上班同胞活在廿分之中嘛！點會唔仆到嚟？
大陸人點解爭住買香港樓，又可以任你地講。貪港女夠獨立呀，貪香港冇結石奶粉呀，貪香港唔會咁易畀人拉上去呀（其實都會，但冇咁易），走資呀，洗黑錢呀，包二奶呀，咩都好。不重要。客觀事實就係佢地爭住買
咁你話，假設樓市大跌，金管局大條道理拎走啲辣招（逆周期嘛，咁升時加辣，跌時當然減），你估樓價會唔會唔升？大陸仔一人一篤痰都浸死你呀。你估佢會唔會好似你咁諗， 「仲係好貴等多幾年先」 「跌勢已成唔好追落去」。
都係一句，呆伯特分析框架。即管估下，以下何者較有可能：1. 畀印花稅都億億聲嘅大陸佬，會因為「仲係好貴等多幾年先」 「跌勢已成唔好追落去」而唔敢買。定係2. 「慳返成億呀仲唔仆去買? 買多十個八個太古城都仲得」
美股有所謂嘅 Greenspan put 或者 Bernanke put．耶倫就因為太短命，少人講Yellen put。唔知係乜嘅去Google，簡單嚟講，只要股冧樓冧，聯儲局自然減息自然放水。
香港冇自己獨立貨幣政策。但香港樓市只此一家，再跌落去，我就堅唔信金管局唔減辣。是為Norman put．
所以呢，啲咩話跌七八成嘅預測，真係祝你好運。而放心，到跌咗七八成，而家日日話貴嘅人一樣冇錢買，一樣唔敢買。
咁當然啦，凱恩斯名句改編，可能未等到乜乜put 你已經跳咗樓。太高位追嘅，乜put都救唔到你．當年買過八號仔嘅應該知。都話要量力而為咯，誠哥冇點你
其實講咗幾千次，真係唔好睇咩負擔比率。香港樓市係十分獨特的一樣東西（你可以話畸型）。
利申：業主，一層自住，樓價跌一半我都未使負資產。聽日我去贖返層樓都仲得。誠哥一早教你，量力而為好緊要。
Facebook 專頁有更多無聊短文: https://www.facebook.com/ivanliresearch/
