兩百零四蚊的早餐 — 再戰蔡瀾越南粉
Facebook 專頁有更多短文: https://www.facebook.com/ivanliresearch/
講明先，呢篇文會講蝶豆花（係啩？）。而我對蝶豆花或者任何食／飲蝶豆花相關東西嘅人係好有保留嘅。點解？冇得解。偏見？係喎。
係喎，語不驚人誓不休。上次篇 《一百七十三蚊的下午茶 — 蔡瀾越南粉》都幾成功。成功在乜？梗係唔係文筆好內容好影相好感情真切。首先係快，都叫做開業第二日，唔係太多人食過。第二係個題起得好。我可以話你知寫文嘅嘢十居其三四都係靠呢啲。咁剩返六七靠乜？就係張相，例如下面呢篇。至於咩內容呀文筆呀，係冇撚人理的。呢啲就係寫文都學到做人嘅道理，有料不如靠快手靠嘩眾取寵，而靠快手靠嘩眾取寵不如靠外表。
咁作為一個有良心嘅作者，我嘩眾取寵得嚟，都仲有啲良心嘅。冇呃你，quite simply，就係二百零四蚊嘅早餐。天地良心，咁呢餐係我當日第二餐啦—但，我又認為十一點已經食完嘅當然係早餐。
是這樣的，應該係我唔知點解我十點幾碌下手機，覺得不如嚟個early lunch啦，記得間嘢好似十一點開。然後再查下，噢耶bingo，原來係開十點。所以就快手衝落去，十點半已經食緊early lunch (六點半食早餐又話你知咩)。
咁早餐特餐常識快餐，都係嗰啲嘢，食嘅都同上次差不多。但今次覺得份外好味，我估係因為冇排咗半個鐘—甚至完全唔使排。而亦因為間舖仲未滿，所以我都食得滋悠啲—我一向係個識做嘅客人，見到多人我自然以光速食完嘢，我接受唔到啲在澳牛談情嘅人。咁撚叻在澳牛求婚丫？塞隻戒指入炒蛋度丫。
咁第個我唔知啦，但我食嘢嘅心情影響覺得好唔好食，正如我當日嘅心情又影響我對一套戲，一本書，甚至一條女嘅評價。所以亦有人話我呢啲不能做到好嘅評論員云云。Fuck That．是但啦。
都係嗰句，唔係周柏豪。雖然自問中文唔差，但描寫係弱項，寫味道更加咪搞我。但最基本嘅嘢做足畀你，河粉軟硬闊窄適中，湯又唔會太鹹太淡，咁咯，用咗好多描寫。另外呢個特別牛肉湯河好呀，夠特別。點特別？就係樣樣有啲。牛栢葉又有，牛筋又有咁咯，啱晒啲有選揀困難症嘅人，如我。又不過，我冇去過墨爾本勇記啦下，但想問當地其實有冇牛丸？（即係，越南有冇牛丸？我估係有的）。硬係覺得牛丸同呢碗嘢好格格不入。
繼續，上次話飽，係咁意食碗粉飲杯嘢同埋整個青檸香茅凍嘛， 有人highlight咗「咩春卷法棍蝦餅只有下次」。咁而家就係下次，唔走數，食春卷啦。一路食一路諗起某女星，係邊個就視乎你咩年代，自己對號入座。「不過唔只係得王寶寶」「只要考生言之成理其他答案都接受」。
講返王寶葆（原來改咗名，笑死）。好唔好味？梗好味。春卷嘅嘢，其實唔難，但睇有冇誠意咯。有啲一早炸定嘅一食就知—咁我冇話抗拒，咪撚扮晒食家啦，但你炸定我咪照寫。而我懷疑呢度都係炸定的，邊得嚟咁多純情學生妹丫—但你覺得個feel似咪得。世事幾時都係perception。朋友話齋，日本師傅一樣落味精，不過高手落咗你都唔知。同樣地，麻甩佬唔抗拒整容女，只係抗拒整得唔好，手工好嘅整咗你都唔知啦。亦同樣地，麻甩佬對咩「素顏」同「 裸妝」嘅認識，唔會高過女人對 「越位」嘅理解。總之，十八蚊有炸得剛好嘅王宝宝（其實佢用邊個寶？），又唔太熱又唔太凍，實在係抵玩。
好，高潮嚟啦，呢杯咁嘅嘢。仆你個街，呢杯咁嘅嘢。好好地好似上次咁飲凍咖啡咪算咯，做乜要試新嘢？但有冇諗過，如果個個都係「好好地搞昨晚嗰件咪算」「好好地試昨晚果招咪算」「好好地用以前部電話咪算」，呢個世界會係幾沒趣，資本主義點會開花，你點會睇緊我寫兩百蚊嘅早餐？
咁所以，人嘅慾望係冇厭足，而邊際滿足又係不停跌嘛，所以人咪試新嘢（對，啲色魔都係咁同自己開脫的）。呢杯嘢叫做「越南多色冰」，咁我預期即係三色冰咁上下嘅嘢啦，多隻色咪多色。結果真係。
但，我真係接受唔到藍色嘅嘢食。細細個老豆車我出食街（我係屯門仔，出鑼灣大過天）見到有款彩虹啫喱，藍色嘅嗰部份令我好不安，明明想食都唔敢叫。（童年早期都係比較幸福，肯叫就有得食，到青春期就好多時想食都唔敢出聲，主要係對住女同學）
咁你話，藍莓呢？痴線啦，春卷我就食！藍苺梗係唔食（對，這是一個gag）。呢堆藍色嘢令我好有戒心，我到而家都唔知係乜，又唔記得問店員。咁姑且當佢係蝶豆花之類嘅東西。因為除咗藍莓外我唔知仲有咩係藍色的放得入口。而我嘅常識話我知呢堆唔係藍莓
結果，我都仲有飲杯嘢。但好少心咁，唔好搞勻。好小心咁用飲筒吸（對，我又破壞環境，但天地良心上次飲凍咖啡我都冇用飲筒，但呢杯唔用飲筒唔知點飲呀下）。吸到去黃色果堆瑪嘉烈（綠豆呀，對，這又是一個gag），就停低啦。好似阿仙奴猜猜猜係都唔肯射咁，好似德國今屆在外圍搓搓差然後射出界咁，又好似我地細個對住女時只在外圍竄擾唔敢直搗黃龍咁。
係架，最後只能唱一句 「避免愛過不再愉快 還是與你將夢停在熱愛邊界」（唔Google知係咩歌嘅嚟搵我請你食春卷）。最後我就係冇成條入晒，只係入一半，插到去綠豆，就小心翼翼唔好再進一步。因為我真係想像唔到將啲藍色嘢整入口係咩感覺。
咁你話，喂，再下面紅紅綠綠嗰啲呢? Sorry 冇食。你話「我覺得好唔公平」，我叫你睇少啲TVB。小朋友，長大啦，呢個世界有冇公平都好，一講呢句你就自貶身價。其實唔係唔講得，你發爛痄鬧人時，或者兇你老細加人工時咪講得—但你真係唔好真係信有咩公平唔公平。
係呀，下面都紅紅綠綠可能好好食的，但只能講句「你說是我們相見恨晚 我說為愛你不夠勇敢」。錯嘅時間，錯嘅出場次序。因為中間有蝶豆花，我就永遠唔知道最底有幾好。
然後諗下，你做人，咪又係咁。正所謂「花滿地奇樹滿林 花多眼亂難評分」（早幾年有個朋友結婚，接新娘架車播呢啲，想點？）。邊有得樣樣試下架？其實越試咪越多遺憾咯。去到某個年紀，你話回塘又好，知足又好，廢老都好—總之我唔會因為想食埋下面嗰啲嘢而去吸蝶豆花咯！我飲完上面嗰堆，覺得好飲，上黎鳩寫幾千字，就已經夠啦。再唔係嘅，下次問埋藍色嗰堆係乜咯，問下可唔可以唔要咯。話晒開張幾日我就幫襯兩次喎，唔係賴皮啲都唔得嘛？
故事教訓？
- 真係唔好輕易相信任何食/飲蝶豆花嘅人
- 搵份可以十點半閃出去食飯嘅工好重要呀下-十一點已經有人排了
Facebook 專頁有更多短文: https://www.facebook.com/ivanliresearch/
