四十大壽: 念念不忘，必有迴響 (長文慎入)
Facebook 專頁有更多短文: https://www.facebook.com/ivanliresearch/
呢篇講多啲自己嘢，但重要都係心靈西湯。
我曾幾何時有個夢想，就係四十歲搵夠一億退休。而家欣然宣佈，已經達成一半 — 因為我已經四十歲了。
人生有幾多個十年？人大咗當然唔會細個咁好期待生日，特別係男人，往往係好普通咁過。咁但有冇諗過點解要慶祝生日？因為呢個係一個屬於自己嘅節日，亦可能係唯一一個，唯一一日會有啲嘢係圍住你轉。只要唔係同你天大仇口，你受咩委屈，講一句「今日我生日」（女仔加多幾滴眼淚更佳），大家都會就住，或者第日先屌 。亦都除非血海深仇，否則多數都唔會揀人哋生日分手。再厭世嘅人，一日未死，都係會有啲感覺嘅。何況本人今年四十大壽？
一兩年前已經諗定，到底呢個四十生日會點。結果平淡過唔平淡，就只係同囡囡食餐cheap飯。原本以為會點都有啲嘢，點都搵啲嘢搞，例如買層樓咁（咩啫？買唔起咩？咁買層日本樓都得掛）。結果冇，乜都冇。
而甚至乎，根本連三十歲生日做咗乜，我都唔係好記得。三十歲理應比四十歲多感覺。女仔固然係，其實男仔都會。因為三十之後就往往唔記得自己幾多歲，成日都要諗。多得Facebook同埋朋友，先話返我知生日搬屋撞穿頭。
不過今年生日呢，都諗咗好多嘢。第一樣就係多次講過嘅（亦係我Twitter置頂嘅推）
類似嘅嘢在上一篇《兄弟班》都有講過。總之唔一定心諗乜就講乜（好快畀人斬死），但我講得出嘅，一定係真心嘅先講。
第二樣想講，想講好耐嘅，就係「念念不忘，必有迴響」。一路都想寫，結果拖咗差不多一個月，今日見到《信報》篇訪問，先觸發到我去寫。篇訪問好睇，但要科水，你自己搵。陳曉明講波，講真我完全唔鍾意。訪問有講佢為教波去到幾盡。咁都真係幾盡，但我其實唔鍾意聽呢啲故事 — 呢啲故事只會訪問啲成功咗或有啲成績嘅人，一大堆衰到趴街嘅唔會有人理 — 變相你會過份高估自己成功嘅機會。呢樣嘢，《思考的藝術》定《行為的藝術》有講過。
觸動我嘅係呢句：你把足球當成事業，入行10年都沒有議價能力，意味着你應該一早轉行
過去一年，各方面都唔太順利（除咗層樓升咗唔少，嘻，但一日未賣一日只係紙上富貴 — 當然好過冇）。當然比上不足比下有好多餘，但快樂係主觀嘅感覺，咁肯定過去一年唔算太開心。但唯一自傲嘅係，過去一年，大膽講句，我個「人情戶口」凈流入，獲得史上最大進帳。直接因為我轉到工升到職加到人工，呃到蝦條嫁得出嘅人，真係有十個八個。施恩莫望報，但他日山窮水盡希望有人關照下。
同時間，呢期其實不少年青人（三十歲以下嗰啲）都在各方面搵我，叫我比下意見。甚至有人叫我去做Life Coach ，去調教下啲年青人。想呢位小友其實冇乜睇我Facebook，唔知我成日怒插新一代。
但無論如何，有好多人係真心聽我意見，之後似乎都幾受用，都真心感激我（咁總唔係以身相許嘅）。明顯哋，佢哋搵我嘅原因唔係因為我叻，而係因為我夠老，變成智慧老人，或者自慰老人。又係喎，都話有次同個新仔記者A傾計，講開另一記者B．A稱B為「資深」，我打個突 — B先三十歲咋喎。然後諗下，又係喎，三十歲都做咗七八年，梗係資深。而我呢啲已經係歷史文物了（再老啲嘅，同佢哋係溝通唔到的）。
人生在世，不外乎名利權色。你見我咁窮（請睇本文開頭）就知唔會叫我教佢發達。色嘅嘢，我亦唔興做南宮夫人（不過鍾意怒插港女）。咁名同權（有時利都係，其實色都可以係），即係職場胃眼啦，求職擇業，或者前途唔知點算好。
有位小友話其實問我意見前好驚，一方面覺得我勁（邊方面？），但又怕比我X。因為佢覺得我成日恥笑啲廢青追夢不自量力。其實當然唔係咁簡單。以前篇文都提過，我好鼓勵小友去闖。另一小友話想劈炮旅居寫書之類，雖則我唔係好明佢寫乜書要劈炮先寫到，但都鼓勵佢去做。雖則小友話其實公司待佢不薄，佢過幾年都買到樓（頂丫，平時扮廢青，佢話居屋都係樓。咁而家居屋都成千萬喎！），返到嚟實搵唔返，但我都係鼓勵佢去做。
我雖然都唔係好知佢有咩鴻圖大計，但都係鼓勵佢去做。因為我只係問咗佢兩樣嘢，第一，屋企係咪靠佢開飯，咁一如所料唔係。第二，問佢幾多歲。原來未夠三十，咁就去啦。
舊文提過，三十歲前，想做乜咪做乜咯。唔好拗話點解唔係廿九或者三十一，但三十歲前不妨去做，亦即係話，三十歲後就好認定方向了。同事仆街公司垃圾自己唔好彩懷才不遇人人針對你，係會有的。但你三十歲前應該夠你轉行轉工甚至裸辭反省，如果三十歲都仲係人人對你，人人唔欣賞你嘅，多數都係你問題，或者入錯行
我想講嘅，始終係「念念不忘，必有迴響」。我嘅演繹係：如果你係行啱路，個「天」係會話你知，係會有感應的。我唔係神婆上身，但試過你就知。具體啲去解，你行啱路，未必即時成功，可能有排搞，甚至最後都唔係好成功，但你會感覺到的。相反，你行錯路，都係自己知道唔對路的。
即係點？再科學啲。我最初做銀行，做Dealer（係讀D拿，但由於我叫阿聲，朋友都叫刁拿聲）。第一日自己真係落場做，嚇到標屎。完全自己落左乜價又唔知，到價有人叫又唔知，要老細提（梗係在側邊啦）。其實唔係提，係屌（老細好火爆，真係會講粗口，當時仲要係成間房都男人 — 正確黎講得我同佢，因為之前條女走咗我先坐正 — 唔屌你屌邊個），去到最尾甚至搶埋個電話自己講 — 即係好似你學車，師傅要搶你軚咁。我嘅第一日落場，上午就係咁。中午我閂埋自己在廁所，冇喊，不過都幾乎想。下午同老細講，拿我會再試下（不過我冇講「今日做得唔好，唔要」），如果真係搞唔掂我會辭職架啦。
結果，下午呢，其實都唔係好大改善，但總叫咗屌住傍住完成一日。收市（銀行同業拆借都有收市，外匯都有，不贅），我就成個卡利奧斯咁款。然後老細開口：「點呀肥仔，仲頂得順呀？」，笑笑口咁就拍左我膊頭。之後當然係越做越順，唔敢話好叻，但後期直頭玩住ICQ捉住圍棋咁都得．
講呢個故事嘅目的係，我個頭開得夠晒差，但至少證明我唔係完全入錯行（做銀行之前我係教書的）。你用心，而又唔係太冇天份，慢慢就會越做越好。進展因人而言，亦睇運氣，又睇天資。可以去到咩水平亦都唔係自己控制度。
但總之，在呢個過程中，你係見到自己進步，其他人都見到你進步嘅。咁你咪冇行錯路。相反，如果我果時想做郭富城或者C朗拿度，就肯定會發現自己入錯行 — 你可以話，都唔係丫，你日日去練波，都應該有進步，由0.0000001進到0.000001 — 但我幾肯定當中我會放棄，嫌辛苦，嫌畀人笑 — 咁亦都即係，你一係未夠天份，一係未夠想 — 結果都係一樣，你入錯行
所以，想做，咪去做咯。但你付出得十年八年，應該點都有啲成績。陳曉明話頭，你追夢，靠足球做事業，但十年都冇議價能力嘅 — 即係你一早應該轉行啦。
我覺得放落任何一行都啱。你有夢想，肯低人工唔收錢倒貼入行，OK．想旅居想搞app想寫作咩都好，去做咯。但每一日嘅進展，個天都話畀你知，你係咪啱嘅方向。如果你搞幾年都係冇寸進，都仲係「香港人冇視野」「香港人短視」，咁就請你收檔了。
我以前在香港01寫稿，係有稿費收的。聽聞都算唔錯。但講真同可以靠寫文為生仲有好大好大段距離，麗晶大賓館同麗晶酒店嘅距離。咁做乜仲寫？係愛呀，DLKH
我正式非正式寫咗咁多年文，有畀讀者屌，有屌返讀者。甚至朋友都屌。我老母更加唔明做乜我日日在網上胡言亂語，我舊老細一樣唔明做乜冇錢收我都寫。咪就係愛咯，DLKH。你話錢？冇架。係愛咯。但至少一路以黎，我都覺得寫文令我become a better person．因為寫文我就要睇書睇文，因為睇書睇文再寫文我就開心。人哋問我覺得寫得最好嘅係邊篇文，我仲可以好自豪咁講：係下一篇
唔止行業，其實對人，對朋友，對親戚，溝仔溝女都係一樣。大家都應該知道最好就有錢，冇錢就靚仔，唔靚仔就要夠無恥。至於咩「上進心」「心地好」呢啲係賣倫敦金先用嘅。我成功溝過不少女，失敗嘅更多，做過好多好低能嘅事，後來就真係發現 — 如果係啱channel嘅，總會有啲反應。唔擔保你最後可以修成正果，可能聽日就有個富二代截你糊，或者臨結婚先有個初戀情人返黎橫刀奪愛。但至少，個過程中你應該見到係有進步嘅。如果人哋都完全唔理你，或者勉為其難同你出一次街然後十問九唔應嘅。唔該，唔好信咩「誠意」打到對方。得你一個有誠意？女神個個想上，大把毒撚有誠意又得閒，你肯定你最有誠意？
所以，根本唔好自己呃自己，踢落去，三幾十分鐘，對路唔對路，自己知的。咁當然愛慾嘅嘢，就唔係咁理性。有啲人根本就係享受呢種得不到嘅感覺，有啲女根本就係享受畀人遭蹋。呢啲係佢哋建構自我形象嘅一部份，你幫唔到佢的。容祖兒首《痛愛》唱到變金曲，唔係偶然。唔係肯畀條仔打畀條仔中出開房錢自己比落仔錢自己比，點顯出愛情嘅偉大？咁價值觀嘅嘢，就好難話對錯。我嘅金句：有人鍾意食屎，有人鍾意睇人食屎，都係品味嚟啫。
不過就真係唔該唔好怨個天，一開始你都知道係唔work架啦。你只係享受行錯路然後話畀人知你好肯付出嘅感覺啫。
所以呢，其實唔難。想追夢？追咯。想寫文？寫咯。不過去到咁上下，就真係要知道自己係咪行錯路了
Facebook 專頁有更多短文: https://www.facebook.com/ivanliresearch/
