星期日我去了考 JPLT N3
但這不是試後感想
算係達成個長久以來嘅小心願吧。
如果大家仲記得好耐以前嘅第一篇文，應該知道我未考過日文 JLPT 考試。而上星期日，我終於去咗試玩下。
今次報名考試都叫幾心血來潮。當時八月尾喺 Facebook 見到有人話 12 月嘅 JLPT 可以報名，於是走上官網睇下，發現考試費先至 $500。比起各歐洲語言嘅學費、考試費平得多，所以一下就撳咗落去報名。
報名考試，首先都係要確定自己能夠準時赴考。由於 N5 同 N4 都要大清早去考試，難度上從一開始已直接排除。上網 search 過下後，發覺喺兩三個月內跳上 N3 至 N1 者，多數都只會跳去 N3。而且自己都冇打算三個月裡面齋讀日文，所以就懶得再挑戰難度，試考個下午場最易嘅 N3 算。反正都唔想搞到自己咁頻撲。
報咗名後總要讀書。講起學、溫日文，自己最接近「認真學習」嘅時期，大概係當年考完 DSE 後賦閒在家 (而家都係) 嗰個半月。嗰時每日都喺度睇文法、生字同動漫畫，個半月後去日本 grad trip 時啲遊客日文都還可以，只係去完旅行後就冇再理過。之後 Year 2 嗰陣都有諗住從頭嚟過，想喺香港大學店 reg 日文做 free elective ，仲借咗人哋本 textbook 一窺究竟。不過喺學店嘅封閉制度下，科到底係 reg 唔成，書都因為同物主不再熟絡還唔成。而借、買咗嘅 textbook 亦冇點睇過，直到而家都係，因為嗰兩本睇完好似都係得 N5。
手頭上得本唔知幾時買嘅 N3 文法雞精書，所以好多時都係靠睇啲自學網。先係再食過啲助詞、動詞活用、使役授受關係，然後再啃各種句型。講到呢度想講返，相比起其他接觸、學習過嘅印歐語系語言，大多數日語教材所指嘅「文法」，與其話係 grammar，倒不如話係啲慣用句型、喺唔同情況下嘅 fixed expressions 更為貼切。本雞精書都係咁，唔少分開列出嘅「文法」，都係由一個核心字詞，喺前、後接上不同嘅片語所構成。雖說意思唔同，但基礎概念都是一樣，但本書就當成係好多個唔同嘅文法咁。
認字方面，因為自己係個好鍾意「分類」唔同 items 嘅人，所以主要係喺網上抄低 vocab list (抄到咁上下變咗為練字而抄咁，得日文先做到)，再放到 Anki 練習。Anki 日文「暗記」，係個以間隔重覆 (spaced repetition) 原理嚟鞏固記憶嘅 flashcard app，適合語言學習者同專科學生使用。當然，要使 flashcard 上嘅內容成為長期記憶，就要堅持定期溫習。但就算只想短期衝刺者，Anki 都幾啱用。iOS 版要俾錢，但可以用 browser 開網頁版代替。
