I TALAKAK NGA BIYAHERU

(Nepalasig nga istorya)

Maddagun nga mabbyahe i tadday nga minallaku. Maski kadagunan na uran anna mafuyo i dalan ay arian na yaw panunnutan. Nattakay yayya ta kabayu na nga magguggun ta kariton nga napannu ta laku na ira.

Egga yaya ta arubayan na tadday nga ili, kunnud gavva tu ta nelumang i pilik na kariton na ta adalam nga fuyo.

“Afu, disgrasya mabba! Nelumang ta fuyo i pilik na karitok-ku. Anni pano i kwak-ku?” Paggi makkulle yaya ta nepallo nga daddam na. Duldulangan na laman i pilik nga nelumang ta fuyo.

“Nu egga laman i tolay nga masikan nga awayya makoffun niakan nga mangitubba ta karitok-ku, siguru makapanaw nga’ insigida taw,” kagi na.

Nakasingan yaya ta tadday lalaki nga atannang anna nabanak i baggi na, nga maddagun gumatang ta aranni nga tyenda. Ginavva na yaw nga kinulletan. “Hu, kwa! Pssst!”

Ngem, ari yayya naginna nuri atannang nga lalaki. Inagalan na uli yuri lalaki. Adde ta nallipay yuri lalaki nga atannang.

“Sikaw! Sikaw lagu!” Magaya nga nakkulle yuri minallaku.

“Mabi ka! Uffunam-ma’ nga makapanaw taw. Nelumang ta fuyo i karitok-ku” kinagi uli na minallaku.

Nasingan na atannang nga lalaki nga ari laman gapa nakkadda ta kabayu na yuri lalaki nga makkiddaw ta uffun. Arian na laman gapa nga pinurban nga magguyu tapenu melawan na i kariton na ta fuyo.

“Mabi ka ngana ta uffunam-ma’!” kulle paga nuri minallaku. Agamundu yuri atannang nga lalaki turi ta arubang na tyenda. Enna gapa nakkulle nga simibbak.

“Ngatta ta uffunat-taka, ni baggim lagu ay manaki mu uffunan! Makkadda ka tatun anna purbam-mu guggunan i karitom-mu, nage taka uffunan nga makapanaw tatun,” tabbak nuri tolay nga atannang.

Mensahe: Manguffun i Dios ta totolay nga manguffun ta baggi da.

~~~~~~~~~~~
Nappasa nga artikulo: Himno na Magili
Tumunuk nga artikulo: Giya onu Tuggub ta Papparan onu Pa-prepara ta Dattal na Lunik