Governo vs citadin: sem rivad a la rotura?
Me despias ma mi, el disi subit, me se incagaroo di noeuve restrizzion, perchè lor hann fallad tuscoss e adess voeulen fàlla pagà a nunch.
La prima ondada el se saveva nagot, la segonda gh’havevom de specià el vacin, adess el vacin ghe l’hem ma desgià che l’hann fad mal e donca nunch gh’hem de renonzià a lavorà, libertà, socialità e inscì via perchè hann vacinad quej de vint agn e no i vegg.
Ghe n’è mia de scuse per i so eror, me despias, e l’è ciar che ‘n quajvun, in di palazzi del poder, el pensa ‘na roba compagna de “el virus l’è ‘l nemis, el virus el menen i citadin e donca i citadin inn el nemis”.
Ciar, ne disen “i ospedal a inn stressad”. I imprese no? I liber professionista no? I student no? I sgioven, che inn quei pussee colpid di restrizzion menter che i vegg — che impienissen i terapie intensive — poden fà tuscoss, no?
La sgent l’è semper pussee dree a capì che anca se “respetom i regolle” ne sortissom no, desgià che ‘l Stat el fa no quell che ‘l gh’ha de fà, e l’è anca straca de havègh ogni setimana de specià che ‘l Oracol de Stat el scerniss foeu se poden lavorà o no.
Mi, in la darrera zona rossa (fallada) in Lombardia hoo vist una mota de desobedienza: nient de organizzad, nient de hashtag, domà barista che te faseven bever el cafè al banch, sgent che la se incontrava “a dispet del sur Speranza e di so norm”.
Purtrop, cont un governo che ‘l se incaga — complis el curriculum voeud del prim minister de facto e minister de la salut — de ogni conseguenza di so scerne, l’unega manera de viv l’è quella de incagàss anca nunch di mesure che tiren foeura del berret e viver, in sicurezza, in del rispet di mesure de la scienza: ciovè mascarina (mej FFP-2), distanza (anca se cont i limit d’orari gh’hii de sperà ben de fà no assembrament) e polizzia di man.
Perchè nunch, a diferenza del Speranza, se lavorom no mangiom no, soratut a spese di contribuent. E gh’hann de stàgh atent perchè, se tiren trop, res’cen che anca i regolle pussee important — e no i so bojade — sien no respetad.
