呢個世界，除咗《奇洛李維斯回信》，以及《域奇．王維奇回信》之外，原來仲有監管機構向教宗回信。事緣係咁嘅，梵蒂岡教庭信理部較早前發表咗一篇關於金融市場嘅文章，並針對衍生工具，尤其是 CDS (Credit Default Swap ，即係信貸違約掉期) 大肆批評，認為係為市場埋下計時炸彈，潛藏道德風險。
咁全球唯一一個專門監管衍生工具嘅機構，美國商品期貨交易委員會 (U.S. Commodity Futures Trading Commission ，簡稱 CFTC) 呢個星期就作出回應。先唔好講道德批判呢啲拗到上火星都未有結論嘅課題。以文論文， CFTC嘅回應可謂不卑不亢，解釋衍金工具嘅功用亦深入淺出，適宜各位有興趣嘅朋友參詳一下。
咁置記當然會幫手撮要一下，慳返大家少少時間咁啦。
CFTC 一開始就感謝教庭作出發人深省 (thought-provoking reflection) 嘅評論，並且先禮後兵，強調 CFTC 由致力追求高尚情操嘅金融界專業人士組成，其中主席 Christopher Giancarlo 本身亦係虔誠嘅天主教徒。 CFTC 監管美國衍生工具市場超過四十年，以原則為本建立監管框架，以計量分析、對衍生工具具備深入了解、廣泛監察市場運作。
CFTC 鼓勵業界及政商領袖參詳教庭嘅評論，即使關於衍生工具嘅評論大部份集中於第 26 段，但仍然獲得傳媒廣泛報道。 CFTC 希望透過坦率嘅回應，增進雙方對彼此立場嘅理解。
CFTC 嘅回應主要分為三部份：
一、衍生工具嘅社會價值
好簡單講，衍生工具最初嘅原意係畀農民鎖定農作物收成嘅時候嘅價錢，將市場風險轉嫁畀有能力承擔嘅人士，確保農產品市場價格穩定。即使衍生工具今時今日涵蓋利率、貨幣、能源等不同項目，其根本意義都係大同小異…
