Manyungkah Kopi Kawa Daun
Alun abih bakeh pangana pulang kampuang ka Bukiktinggi jo Salingka Agam kapatang lai. Masih banyak tatingga hao-hao kampuang nan yo subana jauah di mato. Rasonyo nio pulang tiok sabanta, mairuik udaro sajuak pun jadi, ditambah manyungkah salero khas ranah minang.
Malanjuik an carito sabalun iko tantang Bukiktinggi Salalu di Hati, sangkek tu hari siang ka sanjo kami singgah di @dangaukawa nan balokasi di Biaro, Kabupaten Agam. Dangau Kawa ko alah jadi “target” kuliner kami katiko alah sampai di Bukik. Mangkonyo bakajaan bana kasinan.
Subananyo alah lamo rasonyo kami nio mancubo Kopi Kawa Daun langsuang di Dangau Kawa ko. Tapi kapatang tu baru ado wakatu bisa singgah sabanta. Sabalun datang, kami alah mancigok dulu Dangau Kawa ko malalui akun Instagram nyo nan bisa diakses di @danaukawa, untuang pulo alah banyak informasi nan balega tantang Dangau Kawa ko, jadi katiko datang kasinan, indak co urang binguang bana eh. Hehehe
Tibo disinan alah pukua 3 manjalang sanjo, kami disambuik jo angin sajuak khas Kabupaten Agam, ditambah lokasi Dangau Kawa ko barado tapek di tapi jalan raya, mamudahkan urang nan nio singgah baiak dari arah Bukiktinggi maupun dari arah Payokumbuah. Tampek duduak di dalam Dangau Kawa ko ado nan lesehan ado pulo nan pakai kurisi. Pamandangan hamparan sawah hijau jo Gunuang Marapi mangawani katiko manyarupuik Kopi Kawa Daun. Ditambah pulo alunan lagu khas Minangkabau nan diputa, manambah cinto rasonyo ka ranah minang.
Ado bamacam Kopi Kawa nan disadiokan, Kopi Kawa Susu jo Kopi Kawa Biaso, ditambah pulo ado menu goreang bakwan angek, tahu isi, jo bika bagai. Kami langsuang pasan Kopi Kawa Daun nan marupokan minuman “best seller” Dangau Kawa ko. Uniknyo Kopi Kawa Daun ko disajikan jo tampuruang karambia nan alah dibarasiahan. Yo sabana taraso tradisionalnyo bantuak urang dulu minum Kopi Kawa. Ndak lupo dikawanan dek goreang bakwan angek jo tahu isi. Yo subana lapeh salero.
Rasonyo kalau ado wakatu, nio kami singgah baliak di Dangau Kawa ko, suasana manyarupuik Kopi Kawa sambia manyungkah goreangan bakwan ko nan ndak tabayang bisa taulang baliak. Kami marekomendasian @dangaukawa ko untuak manjadi salah ciek tujuan wajib katiko bawisata ka Bukiktinggi salingka Agam. Maju taruih @dangaukawa.
