今日觀音借庫,朋友講起,為何中國觀音=姐姐,明明原本佛教觀音=哥哥(仲要有鬚)。
好啦,大家聽故仔~
是咁的,宋朝之前觀音像都係哥哥,甚至叔叔,而且觀音像係有鬚(二撇嗰隻)。觀音形象係個翩翩美男子,簡直係佛教中嘅祖迪羅一樣。
有幾靚仔自己睇:
觀世音菩薩 (梵文:अवलोकितेश्वर,Avalokiteśvara)呢個漢文名,正正係唐三藏(江華)由梵文譯過嚟,意思係「觀察世間音聲覺悟有情」。
BUT!三藏個大佬SIMON LEE 李世民話晒係皇帝,佢個名唔講得,所以「觀世音」簡稱成為「觀音」。
咁觀音本身係咩人?
《悲華經》記載,觀音原名不詳,佢阿爸係轉輪王,轉輪王係印度神話嘅地上君王權力象徵(唔知點解又入埋佛經)。
即係!!
觀音=王子
(唔怪得形象咁靚仔)
所以,喺唐朝,唐三藏介紹俾中國人識嘅明星觀音,其實係男人。
張偉健版《西遊記》成日叫觀音姐姐,係唔成立的。
WELL,《西遊記》係明朝作㗎嘛。
以正視聽。
佛經記載,觀音有三十二種化身。
可以化作:
佛、辟支佛、聲聞、梵王、帝釋、自在天、大自在天、天大將軍、毘沙門、小王、長者、居士、宰官、婆羅門、比丘、比丘尼、優婆塞、優婆夷、婦女、童男、童女、天、龍、夜叉、乾闥婆、阿修羅、迦樓羅、緊那羅、摩睺羅伽、人、非人、執金剛神等等。
(好多《聖傳》角色)
係呀,有比丘尼同婦女。所以觀音係可以化做女性嘅。
不過以觀音像嚟講,都係靚仔。
觀音哥哥幾時開始變成姐姐?
去到宋朝,有個壞鬼道士話:「觀音咪即係道教嘅慈航真人囉」。
於是開始整女觀音像派通街,搞到宋朝打後啲中國觀音都係姐姐。
同埋,亦係呢個時候,觀音姐姐仲無啦啦多咗個名叫「慈航大士」。
唔知係咪古時女神易紅過男神,總之觀音姐姐好快紅遍整個中原。
觀音哥哥喺中原嘅偽娘生活,由宋朝正式開始,一直到咗現代都係偽娘。
亦都可能,觀音係史上第一位偽娘神,亦都應該係最多人崇拜嘅偽娘,仲爭住過繼俾觀音。
(各位偽娘,有神快拜!)
總之,到咗宋朝期間,已經冇人記得觀音係王子。
可能王子呢樣嘢太遙遠,凡人都係傾向親民嘅觀音姐姐?
呢啲係咪叫踢人入會?
要答呢個問題,關鍵係:
慈航真人原本個故仔係點嘅呢?
慈航又被稱為慈航仙姑、慈航道人,按道教經籍《靈寶經》記載,故事是咁的:
慈航,字妙音,原本生於姓王之家(轉輪王個王?都差唔多啫,山寨咗人哋個身份做個姓氏),一出世就係女仔。
妙音妹妹到4歲都係啞嘅唔識講嘢,古人好生養,王爸爸決當生少一個,仲忍心到掉個女去深山,求其搵個山洞放低佢,由佢自生自滅。
(個山叫「阿空山」,位於南浮桑,有晒地名,作到似層層噃。不過,肯肯定聽故仔嘅人係未去過阿空山。)
妙音妹妹喺山洞冇嘢食,奇又奇在,佢吸啖氣都可吸到天地精華而飽咗。
如是者,有一人,一個神人(冇講邊個神,要自己估㖭)經過,見妙音妹妹咁都死唔去,覺得呢個女仔有前途,於是留低個靈童湊大妙音。
靈童都算係半神,教識妙音寫字之餘,仲令佢開到聲講嘢。相信妙音嘅神力就係咁慢慢學番嚟。
跟完靈童學法已經咁勁,嗰個到底係咩神?超神秘…
另一個版本,大家都識嘅《封神榜》小說。
慈航道人個師父係元始天尊,慈航道人一開始就係女仔,修行嘅山洞係普陀山嘅落伽洞,同上面個版本又唔同。
睇吓個地理分佈先。
普陀山,按現今嘅地理分析,喺浙江定海縣舟山群島東邊嘅一個島嶼上面。
東晉嘅《華嚴經》就記載叫做「補怛洛迦」山,只係寫住「喺海上面嘅島仔」。
而唐三藏嘅《大唐西域記》指出, 南海普陀洛伽山喺印度南端嘅秣羅矩吒國(鬼知道度咩,古文咁難明,總之大概係斯里蘭卡嗰邊)。
大佬呀,道教嘅普陀山同佛教嘅普陀山相隔十萬九千里喎,咁都MIX得埋咁癡線。
好啦,咁睇故仔喇。
而喺封神大戰之後,十二金仙之中,慈航同其他三位道仙文殊、普賢、 懼留孫,因為不滿元始天尊私心封咗啲廢柴上封神榜首位,而一齊跳槽去佛教,解釋咗點解佛教會有觀音、文殊同普賢。
人哋明明原本就係佛教㗎喎,躺着也中槍變成叛徒…。
即係咁,《封神榜》始終係小說,而且同《西遊記》一樣,係明朝期間寫成,都係當小說睇算。
咁《靈寶經》呢?
確係道教嘅聖經之一,相傳係東晉末年出現,即係大約公元400年左右。
《靈寶經》當年係潮書,好多文青都睇,文人手上拎住本《靈寶經》,感覺就好似睇緊原本《魔戒》或者莎士比亞咁文藝。
所以《靈寶經》嘅市場佔有率喺當時非常高,東晉之後,隨唐文人都係睇佢大。
佛經方面,要唐朝後,三藏取完經先有比較正式嘅漢文譯文,喺市場佔有率方面,已經輸咗人一截。
以上講咗咁多,係為咗證實,以年份嚟睇,其實《靈寶經》唔係山寨咗觀音個故事,而係喺道教入面,慈航道人確實係早有紀錄。
換轉係現代,王子同女神,到底邊個人氣勁啲?
去到宋朝,佛道兩家爭地盤爭得好緊要,所以班道士將觀音慈航撈埋一齊去摶人氣,係一啲都唔出奇。
(瀨尿牛丸都係撈埋先至紅)
不過,時至今日,睇番個結果,到底道教當年咁樣撈一撈,係捧紅咗自己,定係捧紅咗佛教?實在好微妙…
喺好多中國小說、民間傳說入面,觀音都成日出場擦吓存在感。
順手推吓,連中國古代BL小說入面都有觀音姐姐:
趙雅芝版本係我人生中第一次喺影視作品認識觀世音(個故事就…唔…TVB吖嘛)。六小齡童嘅央視版本喺各方面都係經典,觀音姐姐件衫其實都幾道教FEEL。個人覺得蓋鳴輝最有觀音亦男亦女嘅感覺,可能因為佢成日做小生反串,個形象真係MATCH到爆。
至於我最愛嘅觀音形象,當然係《最遊記》入面嘅雌雄同體形象。
講完!!
多謝收睇~
<伊死講故仔>日本神話系列:
<001>桃太郎~日本最早英雄神=最強暗器~
<002>宗像三女神~日本最早女子偶像組合~
<003>日本賭神必勝秘笈:賭唔一定贏,唔賭一定唔會輸
<004>月讀 — 雌雄莫辨非男也非女
<005>兔神的啟示:食得鹹魚抵得渴,搵人笨者自笨之
<006>重鎚出擊悍衛愛情的女神 — — 須勢理毘賣
<伊死講故仔>中國神話系列:
<001>真偽娘觀音姐姐:見證佛道Cross Over
<伊死講故仔>中國怪談系列:
<001>古代耽美+漫畫推介:男男產子自古有之
<伊死講故仔>中國歷史系列:
同朕Check吓:關於《超時空男臣》<上>袁崇煥大將軍冇可能同小李子李進忠咁老友的八卦
同朕Check吓:關於《超時空男臣》<下>袁崇煥與謀臣SO GAY的八卦
My Medium Record:(Update中)
https://medium.com/@ishi014/my-medium-record-e1f290f9c470
每月月頭會將部份上月免費文章轉做會員限定文章。
順手睇埋吖~
個人BLOGss~
☆伊死的漫畫特區 (講漫畫、讚漫畫)