西門吹雪葩—後記，補漏，大感謝祭
Published in
8 min readJan 31, 2019
Facebook 專頁有更多無聊短文: https://www.facebook.com/ivanliresearch/
嚟緊仲有好嘢，狗年寫到豬年，雙連寫到大連（我在台北就住雙連），但畀篇間場小品你睇住先。好似食米芝蓮每道菜整個雪葩畀你清下，或者試紅酒畀你飲水咁。呢篇就係雪葩。「你衰得過我啲雪葩好食過隔離枱啲主菜？」
我覺得真係威喎，一篇文我要另外寫篇文講後記同補遺，史無前例呀好似。但呢篇文真係別具意義，不枉我半夜食住長崎蛋糕（起身胃酸已倒流）寫到三點，仲嚴斥企圖打搞我寫文嘅愛妻（其實咁多年佢已經知道我寫緊文千萬唔好打擾我，正如佢搶緊機票我都唔敢打擾佢）
Facebook Page 上呢篇唔係史上最多人睇嘅文，亦唔係最多人分享嘅文，medium上面嘅reach 更加係算狗數。但好似係史上最多人留言嘅文，大約係因為最尾一句睇晒請食飯—而居然係有咁多人睇晒的。而呢篇更唔係作者最滿意嘅文，甚至作者自評懷疑呢篇文係平均水準以下。
無論如何，作者已死，寫咗出嚟就係大家嘅。既然咁多人睇咁多人回，有必要補多少少（寫得呢句你就知有成幾千字，正如阻你幾分鐘你生命就冇咗幾十分鐘）
- 老馮好重要。呢篇文係 「到呢樣嘢發生在你身上 你職場就略有小成啦」嘅續篇，兩篇文之間，即係星期一晚，我同老馮，以及一眾耆英同學會嘅舊同事食飯。老馮主動講起（事實我唔會問佢）佢有睇，但話太長頂唔順。既然佢未必會睇，咁我可以講：其實職場上，如果只能感謝一個人，毫無疑問係佢。都話亦兄亦父（但佢大我十年左右）係師傅係前輩係伯樂。我希望佢嘅持久力令佢會睇到呢度，而我當然唔會send畀佢咁cheap，大家麻甩佬，唔會咁啦。
- 我成功證明自己，證明自己唔掂。2014年齊齊被炒後我已冇再同老馮共事，佢有搵過我，唔止一次，有試過另外有人阻止，有試過見到一半佢都閃埋，又有試過我十五十六後又係冇去。除咗錢同草裙舞，都仲真係有一個原因：鄧不利多。即係乜？有睇哈利波特都知鄧不利多死咗（我劇透死全家），但個設定係佢一定要死，因為佢唔走哈利波特點成長？我唔係大吉利是，但同樣道理，我跟住佢時真係樹大好遮蔭，佢係99分嘅老細。撈咗咁多年，講真睇股票我大言不慚有佢七八成功力（有啲嘢我識佢唔識，畢竟我係學院派學霸出身），但學做人，我冇佢兩三成。跟住佢好爽，佢擋晒所有嘢，我同其他同事只需要專心睇股票（呢啲咪好老細）。但，係咪成世咁？我唔係不滿佢。但，係咪應該自己棟支旗出嚟試下？成世佢檔晒嘢，我點成長？所以某程度上，我都選擇自己做小頭目，即使係十九公司嘅小頭目。結果，果然證明自己係唔夠班嘅。但總算證明過。唔試過點甘心？如果我係個咁易甘心嘅人，我唔會教書由萬九蚊人工減到萬二蚊做蕉行啦。
- 唔睇書嘅人，好難寫文寫得好。毋須妄自菲薄，我認為自己寫文係得嘅。亦都好合理—好似開餐廳，你自己都覺得唔好食，好意思叫人嚟幫襯？所以我有呢種「味自慢」。有後輩拎啲寫文心得，我答，除咗勤力（一萬小時法則嘛），仲有就係：睇多啲書。「分析員係演藝事業」呢個講法，其實係睇書講，我當時甚至未做分析員：就係呢本書，好睇的，有中文，但當然建議你睇英文。
- 打後仲會推介更多書，係老土啲，但講真，好過你上Facebook睇波事春秋足球說故事之類的垃圾。波事春秋足球說故事係形容詞，Facebook同埋而家嘅社會，滿係好多呢啲垃圾食物，係過癮，但冇營養，你唔會有得著的。而我做埋打碟，讀者文摘嘅角色，話埋畀你知咩書好睇。In case any one 北京 cares，我在《城寨》嘅網台節目《彌敦道政交所》，一般每次都會分享一本書。佢地搵親我我必到，有得推書係一個重要原因。
- 我都算比上不足比下有餘啦。後來我再人肉搜尋下呀西門吹雪，除咗佢近況（加入咗某大陸公司，但脫離做分析員嘅修羅場），仲見到佢近照。當年佢似當年嘅李澤楷，十年後佢就似而家嘅李澤楷。佢原來讀工程出身，我將呢個故事轉畀某讀工程嘅好朋友，話人讀N展你讀N展，但亦不忘自嘲：我發現佢只係大我幾年，人又CFA你又CFA，不禁心諗，同佢相比我實在太唔掂了。咁當然分析員都有好多種，正如美斯又西甲前鋒武磊亦都西甲前鋒。我都算比上不足比下有餘啦—然後 漸暗的燈火卻叫醒我仍然如舊蹉跎—一諗呢句，就即係冇咗鬥心，滿足於現狀，好似浮士德咁，呢刻都幾好丫，停低啦—就會出事。切忌呢種complacency ，你唔係洛奇或者阿波羅個仔，打你唔死你可以復仇。你多數係做阿波羅。
- 讀者媽我千萬次，我待讀者如初戀。真的，我天生就係食寫文呢行飯（正如李天命命中注定有四個老婆）。因為我每次寫文都仲好似初下海咁，會好期待讀者有乜反應，亦即係未變到老雞咬住個蘋果睇電視「得未呀？快啲啦」咁啦。寫文嘅人必然知，讀者口味係估唔到嘅。你覺得好好嘅文，讀者覺得係精神自瀆。你寫出嚟驚畀讀者媽嘅文（例如呢篇西門吹雪），原來好受歡迎。咁當然我都經歷過好多次呢啲—但都話我待讀者如初戀，每次我都仲會心如鹿撞的，即係次次我都好有反應唔會滑牙—仲唔係天生食呢行飯？
- 年代遠嘅寫多啲，近嘅寫少啲。往後不定期仲會寫更多呢類懷舊文。呢度點都要提下置地記者，我同佢相識但未算好友。但佢講過寫自己嘢一般趕客，我原本都同意，但近幾篇打破呢個鐵律。相信唔係我寫得好或我嘅職場點精彩，而係我可以全無保留打真軍。之但係你肯打真軍唔係對手都肯，李華月當年都好辛苦先搵到男主角同佢一齊癲，你估你肯就得咩。想講嘅係，年代夠久遠，當事人上晒岸離開晒江湖嘅我先會寫—又或者，到我上埋岸就大寫特寫，你睇咗唔高興你老婆睇咗唔高興？我話知你啦。所以遠嘅寫得詳細，近嘅就寫得少—同中國歷史教科書差不多。況且，隔得耐先寫，先會比較抽離咁寫件事，會持平啲。
- 節目預告，好短期內我諗住寫嘅，包括有被炒101 同埋 草裙舞101。真的，煙人畀人煙老細拉過檔對手挖角跳草裙舞炒人被炒，你唔試過晒，職場生涯邊圓滿？我就試過晒啦。被炒101比較簡單，因為都隔得比較耐，同埋被炒最樣衰係我本人。草裙舞101有點難搞，其實會幾好睇，至少我同恒大啲mentee講時佢地留心過睇劉心悠（唔記得講，我其中一個社會任務就係做黃秋生，例如野獸刑警嘅黃秋生，corrupt the youth，教啲大學唔會教你上司唔會教你嘅嘢）。但當中難免會令某啲人十分憤怒（請教我如何跳草裙舞而冇人憤怒）。呢兩篇希望都過年前出到街，stay tuned。
- The best is yet to come．都係嗰句，最好嘅作品，永遠係下一篇。一方面呢樣反映作者（區區在下我本人）揀A又想要B 又諗埋CDE嘅花心性格，但亦代表某啲做人哲學：唔好同人比，冇撚得比（例如西門吹雪，而其實比佢勁比佢叻嘅大有人在）。只求好過以前嘅自己。而寫文好，夠主觀龍門任搬，唔似跑步咁有PB冇得呃自己
- 呢段Dedicated to 神版友。佢話我篇文果然係好林振強。性質似，tone似（林振強影響我寫作不少，冇話咩抄唔抄佢風格，已經入晒骨）。但林振強咁勁，寫佢廣告前同廣告生涯都只係幾篇文搞掂（有趣地，傳媒生涯佢冇寫）。以我呢啲冇乜成就嘅都寫咁多字，明顯都係太多廢話。都係嗰句： 美國羅斯福總統宣布 參與二戰，也不過花了4分鐘，你說的話有比他重要嗎？但自從有咗網上寫文，唔使就版面，有啲人就失晒控，即係我。有冇留意，在香港01年代，係得我先會篇篇寫兩千字，好多作者係最低消費800字就收工的。
- 找數先係真漢子。又，本人啲文，風評唔錯。話唔掂嘅就只係佢唔識貨，理撚得佢。但一向我啲文其實少互動，即係最多like 下share下，亦都有人share時畀朋友鬧（堅係有，包括話呢條友寫嘢好長氣啦，呢條友好撚串啦，呢條友係五毛啦—而我係投公民袋的，吹撚到啤一聲）。呢篇在Facebook Page 出現睇晒請食飯，果然有大量留言，證明寫乜都假。認真的，絶不走數，寫飯咪寫飯咯，已留言嘅全部有份，一百幾廿個請唔起咩你估！我會全部抄低。但最好幫我諗下點搞，總冇理由搞讀者見面位你地三唔識七咁odd，定係好似備用飯咁，我在我常去嘅邊爐舖（唔知我個個星期打邊爐嘅就唔好話係忠實讀者了）留定位你地得閒上去打又得。真係的，PM我話我知點搞。
Facebook 專頁有更多無聊短文: https://www.facebook.com/ivanliresearch/
