蘋果業績其實唔差，但股價大插亦都合理
利申先，有持有少量蘋果股票，已唔記得幾錢買（即係肯定賺緊錢，但買得少有鬼用咩）。本身都用左十年iPhone。但唔用Mac機，應該唔係果粉，唔會睇業績發佈會。
講親蘋果都係好兩極，果粉同果黑勢不兩立。果粉眼中用安卓機嘅係生番窮撚未開化冇品味。果黑心中嘅果粉係傻仔唔識科技水魚土豪扮晒嘢
科技我唔識，但因為蘋果貴為全球最高市值公司，所以類似嘅爭拗就延到去股市。蘋果市值創新高就畀果黑話泡沫，假嘅，冇創意，食老本。蘋果股票急跌果粉就話華爾街分析員唔識嘢，基金經理唔識嘢，本人最識嘢。
咁所以，就等我掃一掃盲。
事實：蘋果最新近出完業績，股價急插，一度失守一萬億美金市值。最後只係勉強守住一萬億，都係要跌7%。同近期幾隻科技股情況差不多。
好啦，業績係咪好差呢？點講都唔係。
盈利，破紀錄。收入，都破紀錄。咁當然，睇開我啲文嘅都知又係嗰句，呢樣嘢本身冇用，冇所謂好業績差業績，只有好過預期定差過預期。咁但，蘋果其實盈利同收入都係高過分析員預期的。
雞蛋挑骨頭，你見到有報導話iPhone銷售低過預期。可能係，但真係爭嗰丁水咁多。街預期4750萬部，實數係4689萬部。爭嗰1%咋喎！
況且，畀你揀，寧願銷量好但冇賺錢，定銷量差但有錢賺？如果只能睇一個數，就梗係要盈利啦。Bottom Line嘛。最重要嘅一樣嘢。純利夠好話知收入銷量乜都低過預期啦（當然樣樣都好就更好）。
而蘋果點解會銷量低過預期，但收入高過預期？答案當然就係單價，ASP，Average Selling Price，遠超預期。舊年618美金一部（平均），今年係793美金，分析員預期只係750蚊．
常識真係冇乜人有。蘋果從來都唔係一間賣到好多電話嘅公司，講出貨量銷量都唔係最多。但佢就係賺到最多錢。機價高，毛利最高，銷量亦都夠好。果黑鬧還鬧，但你咪理，人地就係有方法要啲用戶畀六千蚊買部機。你恨唔嚟。你咪鬧人邪教鬧人笨咯，但就係有人畀錢買。即係你食大家樂都可以鬧人做乜幾千蚊食米芝蓮，「咪又係食完屙出嚟」。你搵開幾百蚊企街一樣可以笑富貴做乜幾十萬搵明星，咪又係一個窿。但就係唔同。結果就係成個手機市場大部份利潤都係蘋果食晒，少部份留畀三星，其他公司齊齊蝕到趴街。
至於上一次業績其中一個亮點，服務收入，大約100億左右。按年按季都升，但真係低過預期。但始終唔係主要收入，冇理由因為爭少少而令股價大跌。
講咗成篇文，咁擺明業績唔差。但依然都跌，我又話合理。點解？下篇解
