粵拼教程(1) — 「前言」同「基本智識」
Subscribe My Channel：https://t.me/cantonvocab
Read my another serie：粵語詞彙每日睇
教程第二部分：粵拼教程(2) — 聲母
粵語，亦即係廣東話，係「漢藏語系」「漢語族」下面嘅一個語言。
粵語通行於香港、澳門、廣東（除潮州、惠州、雷州、瓊州）、廣西東部，亦係其絕大多數人嘅媽舌（母語）。亦通行於世界各地之粵人聚居地，根據「Wikipedia」資料，有超過1.2億人嘅第一語言係粵語，
即使一個高達1.2億人使用嘅語言，由於政府嘅打壓同無視，粵語有非常大嘅可能喺一百年之內消失，變成北話（撈語）嘅一個方言。
粵語除咗澳洲以外，係無任何一個國家正式教授呢個語言，換句話講，除咗澳洲係無國家將粵語正式納入教育。但係澳洲教育粵語嘅資料係基本搵唔到嘅，連教材內容都睇唔到。
另外，香港，南越文化嘅大本營而家都實行所謂嘅普教中，無話普教中喇，本身個教材都係以撈文爲基礎嘅。
一個1.2億人使用嘅語言，毫無書寫上面嘅問題，竟然係無一個國家（澳洲唔確定）嘅學校教授粵文，唯一教授粵語嘅港澳，教科書上面都係用撈文教授？
無一個地方係教粵人如何書寫自己語言，甚至好多人唔識點喺電腦輸入粤文，更加無一個通用嘅粤文標準。
一句話總結就係，混亂。
好似粵語係一個只有幾萬人用嘅小衆語言，但事實上第一語言者嘅數量同日文（1.25億）差唔多。
喺呢種情況之下，粵語喺一百年內，好有可能會成爲撈語嘅方言。
另外一件事我想強調就係，粵語同撈語、地位係對等嘅，同日文、英文亦係對等嘅，同樣都係一個獨立嘅語言。如果你認爲粵語係撈語嘅方言，係違反事實嘅。目前來講，粵語同撈語嘅相似度甚至少於西班牙文同葡文嘅相似度。
保護一個語言，對於普通人可以力所能及嘅方法，就係學習點樣去係日常生活中使用。而喺一個高度發達嘅網絡時代，學識使用一個拼音方案，唔單止可以幫助自己精進粵語，亦可以喺日常生活中使用，例如喺電腦道輸入粵語。
呢個課程之中，我地將會教授《香港語言學學會粵語拼音方案》，即係《粵拼》，係專門針對廣州話嘅。（方言用嘅會喺後邊再教，但係先學習粵拼亦都有幫助）呢個拼音方案集成咗舊有方案嘅優點，同時簡化咗拼寫，對於初學者來講係最容易上手嘅方案之一，尤其係無使用過拼音（如羅馬字、耶魯拼音）嘅學習者。更加重要嘅係，渠係目前最常用嘅粵語拼音方案，最多人通曉嘅方案。
咁我地開始學習喇！
注意：本教程粵語均指廣州話，本教程會用英文輔助教學，但係無英文亦可以輕鬆學習。
音節結構
呢個部份參攷粵語拼盤：http://input.foruto.com/ccc/jyt/index.htm
粵語嘅音節結構分爲三個，分別係聲母、韻母同聲調。
聲母
聲母即係一個音節之中，首先發出來嘅子音。例如「波」【bo1】嘅【b】，「機」【gei1】嘅【g】，都係粵語嘅聲母。
子音係指用牙、脷、齦、脣等器官來阻礙流出來嘅氣流之時，氣流突破封鎖所製造嘅聲音。英文嘅「Ball」裏邊嘅「b」「l」都屬於子音嘅一種。
另外，韻母中嘅韻尾，例如「迫」【bik1】嘅【k】，「兵」【bing1】嘅【ng】，都係子音。
粵語而家有19個聲母。但係聲母唔係必要嘅，有啲字係無聲母嘅，例如「亞」【aa3】、「阿」【o1】。
關於聲母嘅詳細智識，會喺第二章詳細紹介。
韻母
韻母係一個音節之中，除咗聲母剩低嘅發聲部份。韻母必須有母音。母音係直接有聲帶振動、配合脷嘅高低前後位置、嘴脣圓唔圓、擘得開唔開來發出嘅聲音。例如英文嘅「gay」裏邊嘅「ay」、「make」裏邊嘅「a」都係母音。
另外，韻母中嘅韻尾，例如「該」【goi1】嘅【i】，「煲」【bou1】嘅【u】都係母音。
（當然裏邊嘅【o】一樣係母音。）
關於韻母同元音嘅詳細智識，會喺第三章詳細紹介。
聲調
聲調係指音節喺發音嘅過程中嘅高低（音調），大概有五個唔同高低嘅音調。
喺粵語之中，有9個唔同嘅聲調。主要分爲四類，平、上、去、入。其中，仲分有陰陽。
關於聲調嘅詳細智識，會喺第四章詳細紹介。
音節結構 例：
你都可以試下自己分析㗎。
香【Hoeng1】、無【mou6】、一【jat1】、滾【gwan2】
