粵拼教程(2) — 聲母

10 min readMay 10, 2020

Subscribe My Channel：https://t.me/cantonvocab
Read my another serie：粵語詞彙每日睇

可參攷本人製作之分案表，裏邊總結咗現代廣州話會用到嘅所有音 — — sw4-a001.1。
本教程粵語均指廣州話，本教程會用英文輔助教學，但係無英文亦可以輕鬆學習。本教程參攷咗粵語拼盤，penguin99.com，Cantoneseclass101同個人研究。

唔管係學習粵語，定係粵拼，都係先學簡單嘅聲母，再學複雜嘅韻母。

聲母，點樣都會係子音。子音係利用唔同部位，來輔助母音發音，來產生各種唔同嘅聲音，所以有叫做輔音。大部份情況下，子音無法單獨發音，必須要配合母音。例如粵語嘅【b】，必須要配合一個母音先可以發音。例如【aa】，子音【b】+母音【aa】=【baa】（巴）音。子音喺部份情況下可以單獨發音，呢個會喺後邊再講。

聲母(1)：咩叫做送氣音啊？

我地乜都唔講，學咗兩個唔同嘅聲母先喇。

【b】【p】

【b】嘅發音同英文【span】嘅【p】一樣，「巴士」個「巴」就係【b (baa1)】音。
【p】嘅發音同英文【paint】嘅【p】一樣，「趴地」個「趴」就係【p (paa1)】音。

你呢個時候會發現，【b】同【p】兩個發音方式係一樣嘅，但係【b】幾乎唔使出氣，而【p】就要噴哂啲氣出來。

無錯喇，【b】【p】兩個發音都係將個嘴合埋（語言學叫雙脣音），然後含啖氣喺裏邊，之後噴出去。但係唔同嘅就係噴嘅程度喇。【b】幾乎唔使噴，喺語言學上面叫做無氣音。而【p】就反過來，叫做有氣音、送氣音。

唔信嘅話，攞你個手放喺把口面前（唔好太近，而今武漢肺炎唔好摸塊面），講「巴」同「趴」兩個字，比對下、睇下有咩唔同嘅感覺。

【d】【t】

【d】嘅發音同英文【stand】嘅【t】一樣，「一打」個「打」就係【d (daa1)】音。
【t】嘅發音同英文【ten】嘅【t】一樣，「其他」個「他」就係【t (taa1)】音。

兩個嘅分別係，【d】係無氣音，【t】係送氣音。

【d】【t】嘅發音方式又係同【b】【p】一樣嘅，但係渠地區別係個位置。
【d】同【t】發音個陣時個口唔使合埋，而係要將條脷頂係門牙嘅牙牀（齒齦）。

【g】【k】

【g】嘅發音同英文【ski】嘅【k】一樣，「家庭」個「家」就係【g (gaa1)】音。
【k】嘅發音同英文【king】嘅【k】一樣，「電話咭」個「咭」就係【k (kaat1)】音。

兩個嘅分別係，【g】係無氣音，【k】係送氣音。

【g】同【k】發音個陣時口唔使合埋，而係將脷根頂到軟齶，即係口同喉嚨嘅分界位。

【gw】【kw】

粵語有兩個非常特別嘅聲母，就係【gw】同【kw】。

【gw】嘅發音同英文【square】嘅【qu】一樣，「西瓜」個「瓜」就係【gw (gwaa1)】音。
【kw】嘅發音同英文【queen】嘅【qu】一樣，「誇張」個「誇」就係【kw (kwaa1)】音。

但係其實渠嘅發音非常簡單易學，只要喺發【g】同【k】嗰陣時o嘴（語言學叫圓脣）就得。

注意：渠同普通話嘅【gu】【ku】唔係一個發音。另外而家有唔少人係無法分辨【g】【gw】&【k】【kw】嘅區別，建議去粵語審音道親自聽下個發音。

總結/小智識

呢四組唔同嘅發音喺語言學叫做破裂音、塞音。顧名思義，渠係利用脷、嘴脣、牙齒等部位來塞住噴出嘅氣流，喺氣流衝出去嘅一瞬間產生嘅破裂來製造聲音。

當然呢啲你唔需要知道，你只要知道，呢四組音，分別有無氣嘅版本，同有氣嘅版本就可以。

聲母(2)：咩係鼻音、流音啊？

鼻音，顧名思義即係用鼻發出來嘅音。聽起來好簡單係咪，但係實際上好多人係分唔清鼻音個喎，尤其係鼻音【n】同流音【l】嘅區別；齒齦音【n】同軟齶音【ng】。

鼻音【m】

【m】嘅發音同英文【mother】嘅【m】一樣，「媽咪」個「媽」就係【m (maa1)】音。

呢個音係雙脣音（之前學到嘅【b】【p】就係），但係因爲渠係鼻音，同之前學過嘅發音方式都唔一樣。
一樣係將個嘴合埋，之後聲帶振動（注意，前面學到嘅所有聲母聲帶都唔會振動），再將啲氣流從鼻哥窿道出來。

鼻音【n】

【n】嘅發音同英文【nice】嘅【n】一樣，「奶奶」個「奶」就係【n (naai1)】音。

呢個音係齒齦音，條脷嘅位置同之前學到嘅【d】【t】一樣，變咗要用個鼻來發音。

記住，要用鼻發音。如果唔用鼻發音，用咗喉嚨出氣就會變成流音【l】。

有兩個方法可以check到你有無讀啱。
第一個方法就係將你嘅手指，放到鼻哥窿面前，如果發音陣時有少少氣噴出來就啱咗。
第二個方法就係用手指，摸住你個鼻哥，如果有少少震動就啱咗。（記住洗手先好掂）

呢兩個方法可以check所有用鼻哥發嘅音。

鼻音【ng】

【ng】嘅發音同英文【Sing】嘅【ng】一樣，「牙齒」個「牙」就係【ng (ngaa4)】音。

呢個音係軟齶音，條脷嘅位置同之前學到嘅【g】【gw】【k】【kw】係一樣，但係要用個鼻來發音。

有好多人會同【n】混埋一齊，呢個時候只能多多練習。

流音【l】

【l】嘅發音同英文【Love】嘅【l】一樣，「啦啦隊」個「喇」就係【l (laa1)】音。

呢個音同【n】一樣係齒齦音，但係記住，呢個唔同嘅點就係，渠個氣唔係從鼻哥出來。而係喺個喉嚨到出來，經過條脷嘅兩邊流出，所以叫做流音。

你個鼻哥係唔應該震動、出氣嘅。

音節【m】【ng】

音節，即係Syllabic。呢個都係粵語特別之處。

其實理應同韻母一齊教，但係韻母實在唔夠位置。

簡單來講就係聲母都可以單獨發音咁嘅意思。之前講到有部份子音可以單獨發音就係指呢兩個。喺呢種情況下，渠唔會再同母音合併，而係單獨發音。

【m】嘅發音方式、部位係無改變嘅，不過條氣稍爲長啲。喺粵語當中【m】呢個子音常用字，祇有一個字：「唔（毋）」【m4】。好似「唔得」、「唔准」、「唔制」、「唔好」、「唔係」都要用到「唔」字。所以唔好唔識讀呢個「唔」字啊！語氣詞亦會用到【ng】，例如【hm1】、【m2（表疑怪）】、【m6（表同意）】。

【ng】同樣，記住條氣長少少就得。粵語中【ng】呢個音節字亦不多，但都都好常用。例如「吳」【ng4】、「五」【ng5】、「悟」【ng6】等。還有「哼」字，語氣詞亦會用到【ng】，例如【hng6】、「嗯」【ng4】。

總結/小智識

鼻音係容易撈亂嘅部份，記得要多多練習，尤其係鼻音【n】同流音【l】，同埋齒齦音【n】同軟齶音【ng】。另外，音節方面都唔好混埋一齊，好多人都會將軟齶音【ng】讀成雙脣音【m】。

關於子音單獨發音嘅問題（個人研究）

理論上，所有子音都可以單獨發音。但係聲帶唔振動（清）、唔送氣嘅情況下發出嘅聲音，我認爲係無法作爲語言嘅一部份（基本冇可能聽清）。

喺粵語（廣州話）之中，可以用嘅分別有【p】【t】【k】【kw】；【m】【n】【ng】；【l】；【s】【z】【c】；【f】【h】；【j】【w】。

聲母(3)：其他子音

我地喺呢度會學埋
分別係5個擦音：【h】【f】【s】【z】【c】。
仲有2個近音：【j】【w】。

【h】【f】

【h】同【f】喺呢道所有聲母裏邊最容易學嘅。

【h】嘅發音同英文【hope】嘅【h】一樣，「蝦仔」個「蝦」就係【h (haa1)】音。
【f】嘅發音同英文【flower】嘅【f】一樣，「攀枝花」個「花」就係【f (faa1)】音。

【h】嘅發音非常單純，條脷放鬆，嘴擘開少少，之後哈啖氣出來就得。
呢個【h】同撈語唔一樣，條脷根唔應該頂上去嘅。

【f】其實道理一樣，但係上面棚牙要貼住個嘴脣。

【z】【c】【s】

【z】嘅發音同英文【tsunami】嘅【ts】相似，「湯渣」個「渣」就係【z (zaa1)】音。
【c】嘅發音同英文【change】嘅【ch】相似，「交叉」個「叉」就係【c (caa1)】音。
【s】嘅發音同英文【sand】嘅【s】相似，「砂灘」個「砂」就係【s (saa1)】音。

呢三個發音係粵語（廣州話）之中比較特殊，作爲母語者，最好都係按照自己嘅習慣，自然發音會比較好。我諗來諗去，解釋又太複雜（唔適合大衆），我都係覺得睇例子來學習呢三個韻母嘅粵拼會好啲。

亦都係咁，英文發音都係供參攷，實際上有啲人可能會同英文嘅發音一樣，有啲人可能會有唔少少唔同。

做算係咁，你應該都會發現【z】同【c】嘅發音好相似，因爲兩個嘅分別就係，【z】係無氣音，【c】係送氣音。

【j】【w】

【j】嘅發音同英文【you】嘅【y】一樣，「利益」個「益」就係【j (jik1)】音。
要記住，千祈唔好將【j】寫成【y】，更加唔好將呢個【j】讀成英文嘅【j】。

【w】嘅發音同英文【why】嘅【w】相似，「青蛙」個「蛙」就係【w (waa1)】音。

你有無發現，我喺呢道寫嘅野唔同咗。我係話「相似」而唔係「一樣」。因爲喺粵語之中，【w】係唔o嘴（展脣）嘅，除非渠後面接嘅係o嘴（圓脣）韻母。
接咗o嘴韻母嘅聲母w，先同英文嘅【w】發音一樣。呢個後面會講到邊啲係o嘴嘅，邊啲係唔o嘴嘅。不過點講都好，作爲母語者，最重要都係自然發音，呢個只不過係講述咗大部份人嘅情況，唔代表你都係咁。