Aggaw na Yena ira
Verso ni Margie Leal na Solana
Dakal nga pagayaya edda nelaga-lagayya,
Ta nira nga nangivussi nittam nga ana-ana.
Anni nga ziga i kuruga edda inattamman,
Nira nga nangiyagug adde nikeyana tam.
Minay ittam nga ziminakal anna nannono,
Natudduan ittam tu mabbalin nga masippo.
Ira i napopolu nabbalin nga minattuddu,
Nage tam ngamin minay naggugubbo.
Durante ta ettam nga nagabbingan,
Yena i arig nga fuersa-fuersa tam.
Ira ngamin i kanayun mangiprepara,
Gatto, kanan, sinnun o anni laman.
Ari ira nga nagimmang adde nakapabalin ira,
Tape egga fundasyon nu ettam maffamilya.
Neyawa da nittam i sika-sikad da ngamin,
Tape ittam nga ana-ana gapa ay makabalin.
Nakapabalin onu awan ay mekunnay laman,
Nga meyawa i pangikakwa anna aya tam.
Ta i nawag na mundo ay ariat-tam nasingan,
Nu turi ay edda sittam nga tinazza-tazzian!
Mabbalin nakuan tu arig espejo tam ira,
Sangaw ta ettam gapa ngana naffamilya.
Tape kunnun na ay gatabat-tam adde noka,
Aya anna pangikakwa na ana-ana tam gapa.
Nappasa nga artikulo: ALIRING
Tumunuk nga artikulo: ARTIKULO: Kolor ta Ibanag
