ALIRING

Verso ni Carlvon Aquino na Pamplona (tuvvug ta dana nga verso na Mappase-fasensya ka…)

“Mappase-fasensya ka laman, palak,
Nu sikaw ngawe ay azza ta gukak.
Egga lava noka ya dagun,
Nga sikaw mavi ya azza ta uttun.”

Ari ka maggagalo, kofun,
Nu bavallem sangawe ya dagun.
Egga lava noka ya pakalukak mu ta umma,
Nga sikaw mavi ya awan tu awayya.

Ari ka makkulle, ari ka mappaffu,
Ta ziga na pattotolem, ‘sigida mekukkukku.
Ari ka maggino nga makkarera,
Maske ta pakeruffum, itattaddak mu ya bandera.

Nu atatazzitad-daka na tatolay ta biko mu,
Panguffun, pabbalavalo lagafa ya nonofam-mu.
Ta maske kunassi ya katuzzi da,
Mattabba lava noka ngamin ya ovra-ovrad-da.

Ya attotole tam-aw ay gitta na aliring,
Ari maginno nga makkaro-karolik, biring la biring.
Pammakatalo ta Yafu maske anni kava-kavaram-mu,
Pagiddu mu vi ta bagim tu olu, yatun galaman pagiddanamammu

(Retratu na Pamplona Tourism)

~~~~~~~~~~~~~~~~~~~~
Nappasa nga artikulo: Ibanag Children’s Rhymes
Tumunuk nga artikulo: Aggaw na Yena ira