捱咗一晚夜,終於睇埋最後兩集《First Love》。(講呢句開場白已經係十日前,篇文放喺度寫極都唔完,最後斷斷續續寫咗成個禮拜先寫得晒)
今日作客睇 V台,接近之前睇 TVB 咁尷尬:因為真係唔知套劇會唔會伏到唔敢睇。
睇咗一集韓劇《惡魔法官》,同自家劇《百萬同居計劃》。嘗試唔做比較啦,分開講兩套劇。
《惡魔法官》基本上一集內將所有劇集世界觀、整個民粹城市、普羅市民嘅易操控性、角色矛盾等展現晒出嚟:雖則我個人唔喜韓劇過份面譜化,但整體嚟講都係精彩嘅。呢套睇落無感情線,只講人性同制度醜惡,完全開正韓劇強勢果範。