路仍是要行

活咗咁多年，從來都唔覺得自己夠料寄語年輕人：佢哋呢代人遇到嘅嘢一定唔同於我哋呢代，比如我喺佢哋嘅年紀都仲係舊薯仔，但有啲啱啱畢業嘅已經係好有能力兼好識照顧人。所以我一直認為睇年齡不如睇世代，我就覺得呢個世代嘅後生比我呢代人係多一分靭性，畢竟比起我果時讀書傻下傻下又一日，呢個年頭畢業，要面對嘅都係比較凶險。

不過講就咁講，我總係會有個感覺（唔知係咪錯覺），我認為人生嘅路係會越走越易 — — 畢竟好多人細個嘅選擇就只有讀書（我唔敢話讀書無用），好易一張成績單定生死。但人大咗選擇同可能性會越嚟越多，而老咗就調轉無咩需要揀。感覺真係無讀書咁難。

所以點都好，當你有個心態係：之後嘅路係會越嚟越好行、或者可能性係會越嚟越多，咁諗應該係會好過啲掛。

特別的平凡人

以前有排好興講「你咪以為自己好特別，其實你只係平凡人一個」，但到發現自己生命上嘅稜角時，卻無人教你如何自處。其實咁講啦：每個人都無可避免有同其他人唔同嘅位，尤其是觀點同睇法上。

大部分人都唔識處理呢種唔同，加上文化土壤上唔鼓勵，好多時都係選擇自我修正同跟大旋律就算。久而久之都幾影響思考。

以為網絡世界自由咗咩？其實唔係。社交媒體演算法作怪，同溫層圍爐風氣嚴重，一方面就自以為係KOL 講嘅都係真理，另一方面就跟住某啲主旋律走而不自知。

大家唔好誤會，我唔係講咩解決方案、宣揚教義，而係想講：你就係你，唔好因為群眾壓力而怕咗表達自己觀點。