有兩三個鐘頭可以快閃行，去大埔滘林徑行紅路足夠有餘。紅路基本上同另一路線藍路拍住上，只係高度有異。處於低位的紅路，提供親近溪流的機會，而且行得更加輕鬆。
行山路線：
松仔園巴士站 ＞大埔滘自然護理區 ＞大埔滘林徑（紅路）＞松仔園巴士站
穿過大埔滘自然護理區閘口，沿馬路上斜，有巿民帶埋狗仔嚟行山，狗仔笑咪咪嗰樣超可愛。到達大埔滘林徑的四色路入口，循紅路指示牌走。
紅路長 3 公里，係四色路（紅、藍、黃、啡）中最短。同藍路（長 4 公里）比較，紅路少啲上上落落，有流水聲陪伴，要行小橋過溪流，係紅路一大特色。紅路比藍路易行，不過冇藍路咁好風，最好帶把扇旁身。
輕輕鬆鬆行到尾段，由泥地路轉行石屎馬路，下行返回大埔滘自然護理區閘口，袋住雀仔唱歌的錄音、大自然靈氣，容光煥發咁坐巴士返回塵世。
*** *** ***
行山貼士：
- 自己垃圾，自己帶走，包括水果皮、果芯。
- 準備足夠糧水。
- 全程喺林木區內遊走，唔曬，路線屬男女老幼皆宜，重點在防蚊。
- 完成行程時間：1 小時 30 分
🚏 🚌 🚏 🚌 🚏 🚌 🚏 🚌 🚏 🚌
交通貼士：
九巴 72 / 72A / 73A / 74A 或綠色小巴 28K 到松仔園站
