你新一年的目標：參加分餅仔，至少都見證下
Facebook 專頁有更多短文: https://www.facebook.com/ivanliresearch/
曼聯名宿簡東拿，在起飛腳踢球迷罪成後嘅記者會，講過呢句：海鷗跟住漁船，係因為以為有沙甸魚掟落海。然後就起身走人，型（或串）到不堪。
恭喜發財！梗係發財啦，唔通拯救世界咩，搞掂自己先啦。送張賀年揮春畀你先。
今日教大家職場成功之道，其實就好簡單，一句嘅啫。即係踢波嘅，梗係前鋒入多啲波中場唔好畀人搶到波後防唔好失波，其實唔難。投資嘅，都係低買高賣，有幾難？溝女嘅，都係投其所好。點將隻大笨象放落雪櫃？好簡單，打開雪櫃門，放大笨象落去。
真的，就一句：頂住捱佢幾年，受幾年苦，然後爬到上個可以肥上瘦下嘅位，咁你打後就舒服好多。唔係老點你。
千萬唔好信咩enjoy your work。我係老派人，唔信呢味嘢。唔記得邊個日本仔講，邊位話返工好開心嘅，聽日我就當呢度迪士尼，門口收入場券。因為你好開心嘛，咁梗係你畀錢公司，唔係公司畀錢你。杜汶澤話齋，你去唱K你畀錢人自己唱，同你去紅館開演唱會，人地畀錢聽你唱，就真係兩回事。
千其唔好以為啲勁人好享受工作。拳王阿里都話過：我最憎訓練，每分鐘都咁憎。但我同自己講，頂Ｘ住，而家受下苦，到你做咗冠軍就成世可以做廢老指點江山。
如何頂住「捱佢幾年，受幾年苦」呢part就真係講就易，有機會寫多一百幾十篇文講。但，客觀上上位係難咗，新一代嘅小朋友難免覺得「做到仆街都未必上到位」，又係真的。不過我嘅勉勵始終係：正係因為你啲對手個個都咁諗，你稍為用下力，已經好過佢哋。
但，捱到咩位？呢個真係因人而異。冇得講的，個個都話想做CEO 想做明拍 想打NBA，但有冇諗過自己係咪冇料？你好勁？同你爭得嘅全部都好勁架啦，最廢嘅入場資格都冇。你好肯付出？同上。就算我同你同人一樣勁一樣咁肯付出，可能真係冇運呢？
但一般而言，我覺得捱到去一個位，你可以肥上瘦下，參加分餅仔遊戲，咁你就可以開始變畀Mr. T 打鑊甘前嘅洛奇，或者變做畀蘇聯仔打鑊甘前嘅小阿波羅，可以complacent 了（誰不想？）。記住complacent咗就唔好學大阿波羅咁仲要「證明自己」，可大可少。
真的，咩係高層低層，其實都可以好模糊。咩係低層大家應該知，最低人工嗰啲，乜福利都冇嘅。乜嘢係高層大家都知，出差坐頭等（越嚟越少咯）商務（仲有嘅）嗰啲友，可以開公數嘅嗰啲友，可以拉埋馬仔過檔嗰啲友。
但中間仲有一大堆唔知係乜水嘅東西，特別係而家啲職場梯圖亂Q咁嚟，你可以話我未入過C-suite 未拎過大梯圖．但梯圖呢啲真係我其中一樣least care 嘅東西。先講錢，再講老細，其他萬事易商量。但凡仔呀女呀同我講佢係乜乜Director ，或者佢條仔佢條女係乜VP呀，我都係笑下算，幾錢人工先？或者更殘忍嘅問句：你公司有幾多個VP？（再仆街啲：你公司有幾多個唔係VP ？）
真的，梯圖唔值錢，人工最實際。我在台灣佬度係研究部主管，去到星展唔係。但我都仲走，主要都係$。出唔起錢嘅公司先出梯圖畀你，你咪叫自己三軍總司令咯，梯圖衰過打安拉game啲武器皮膚王位，要幾多有幾多。亦都同樣地，你自己搞公司呀做朋友公司呀（例如我而家），就唔好太搞笑叫自己Chief 乜乜，否則都係畀人笑。你間公司得十條友你叫自己COO？
講返，除咗人工，仲有兩樣嘢衡量咩係「目標」。第一就係權，權嘅嘢主要係得一種，就係Hire and Fire，冇嘅亦係講乜都假。等於上篇文提過，做得老細梗係可以拉隊過檔，唔係拉晒都拉到幾件，唔得嘅，即係未夠料。反轉都係，你睇唔順超個下屬都冇得郁佢嘅，你啲乜乜梯圖，只係紙老虎。（但，我知有啲大公司真係咁，所以我亦比較怕啲大公司）
就算冇Hire and Fire嘅，至少你都做到，最初講嘅，肥上瘦下嘅過程，分餅仔嘅過程。就算唔係分花紅都至少係升職加人工之類。就算你唔係落刀嗰個，至少都可以狐假虎威，畀下意見呀獅大王，應該點分。呢份我嘅（半舊），呢份你嘅（四份一舊），呢份呀邊個邊個嘅（一片），剩返（一堆餅碎）大家嘅。
分餅仔呢啲各處鄉村各處例，有啲係上面分完成盒西餅得返件椰撻畀你老細仲要分畀幾十人，有啲係中央集權幾多分就分幾多（咁，個「分餅」過程就提早去到填阿丕嫂了），但原則都係一樣：唔該，你做到去可以有份分嗰個，就算冇份分都至少可以畀下意見獅大王 — 退一萬步，我當你冇得出聲（冇大冇細呢度幾時到你講嘢呀？），至少你都見證個過程，知道邊個分得多分得少，等你第時避重就輕，知道老細心中邊個廢柴，或者做神探研究下邊個同邊個有路然後捉佢黃腳雞勒索佢（或者取而代之，任你）。
乜都唔知只係等信封謝主隆恩嘅，連其他人拎乜你都唔知嘅（下？抗菲釘嫂？你覺得呢個世界有抗菲釘嫂？），你嘅仕途都仲係未成功，其實都幾失敗。唔緊要，繼續努力。你公司冇呢啲嘢？冇分餅仔嘅位？轉工啦下。做金融唔分餅仔，不如落樓下整西餅。
有得參加（或者少見證）分餅仔嘅人，人工唔會太低（當然大把人覺得十幾廿皮人工都係好普通，任你，你搵到先講呢句），梯圖唔會太細。但都不止如此，仲有好多實際用途。
首先，你冇得參加，甚至見證都冇份嘅，你啲下屬點服你？你係偽老細啫。冇得炒冇得請都算啦。至少要賞罰分明，做得好嘅你冇得獎，做得差嘅一樣係咁，邊有人理你？Hea鳩你得啦，你可以拿我怎樣？
二來，都真係你做過呢啲勾當，先好出去同人講你「管理」過人。「管理」呢，兩個字，即係渣春袋（抱歉唔知女性版本應該點叫）。你冇渣過人春袋，學乜人講你「管理」過人？
所以，新一年希望大家繼續努力。就勤力些少上心些少，其實唔難。上到去個可以肥上瘦下嘅位，有得參加下或者見證下分餅仔 — 之後你會更上一層樓，定係永遠做睇嗰個，就睇你造化
但，唔好搞到自己連做見證嗰個都冇咯，好淒涼的。
我？我又梗係乜都做過，食餅碎食過，餅碎都冇要whatsapp 問老細「餵食時間過咗啦？點解我餅碎都冇嘅？」又試過，參與分餅又試過。
而家，我就梗係側邊影相食花生（企鵝唔會搶花生的）嗰個啦。但你要做到去右邊餵人嗰個。SEE？你就去長崎睇企鵝，但我睇嘅係你嘅人生。
下篇文（希望）同大家轉個角度，未知生先講死，講下畀人炒點算點收科，點樣走得優雅（其實好難）。再之後教大家跳草裙舞。
Facebook 專頁有更多短文: https://www.facebook.com/ivanliresearch/
