事前估計,用五個鐘行晒黃路全程 10 公里。 到現場行咗個半鐘,發現步速太慢,可能天黑都未完成,中途轉入啡路縮短行程。只怪自己準備不足,有需要加強鍛鍊腳骨力喇。
行山路線:
松仔園巴士站 >大埔滘自然護理區 >大埔滘林徑(黃路、啡路)>松仔園巴士站
嚟過四色林徑幾次,知道黃徑係最長一段,官方估計 3 個半鐘行得晒 10 公里。自知能力所限,加多個半鐘一定冇衰。
黃啡兩路初重叠
一如以往,喺大埔滘自然護理區閘口上斜,到四色林徑入口跟路牌走。黃路初段同啡路重叠,隨後分道。比起另外紅、藍兩色林徑,黃啡路上靜英英,即使係假期,只遇到幾位從反方向而來的山友, 或者天氣熱係原因之一。
以為全程行林徑,即使長途都唔會有大問題,現實係爆汗比預期的來得更快、更烈。部份路段超悶熱,兼且多蚊,一停步,啲蚊就立即撲埋嚟,明顯好餓,焗住不斷行。
路面多變化 測試行山鞋實力
路面變化多端,完全估佢唔到,有容易跣腳的青苔路、大石路、高石級、沙路、泥路、樹根路、撥開植物先見到的窄路等等,應有盡有,適合測試行山鞋實力。
就喺咁,不斷穿梭林蔭及見天步道,沿路冇靚景,有幾個位遠眺中大,不過能見度低,遠方白濛濛。喺分岔口睇地圖,前面仲有三分二路程,手錶誠實地顯示步速慢過預期,決定改行小徑入啡路,縮短行程。
適合愛長時間行山林路人士
轉走啡路後開始下坡,一輪上落後重新連接黃路,尾段滙入藍路,最終返出石屎馬路,一直下行到大埔滘自然護理區閘口離開。喜歡長時間行走山林路、唔追求靚風景的朋友,不妨嚟體驗吓。
*** *** ***
行山貼士:
- 自己垃圾,自己帶走,包括水果皮、果芯。
- 路線長,必須準備足夠糧水,慎防中暑。
- 部份路段多蚊,絕對要防蚊。
- 未轉入啡路前,手機曾經出現冇網絡,又試過轉咗大陸漫遊。
- 松仔園巴士站附近有野猴子出沒。遇見野猴應點做。
- 完成行程時間:4 小時 30 分
🚏 🚌 🚏 🚌 🚏 🚌 🚏 🚌 🚏 🚌
交通貼士:
九巴 72 / 72A / 73A / 74A 或綠色小巴 28K 到松仔園站