我想了解法仔多啲，開始主動問關於佢嘅嘢，例如喜好、習慣、成長背景。我會問佢鍾意貓定狗多啲、鍾意用黃燈定白燈、細個嗰陣屋企興唔興體罰…可能有人會覺得好odd，但我份人鍾意直來直往，打開口牌令我比較安心。我想知，就會問。
「有啲乜嘢可以令你發嬲？」問定先，以免日後踩到佢底線。「我？我唔知…我幾乎從來唔發嬲…」「嘩…咁我哋之間有冇爭執，係咪視乎我控唔控制到自己情緒？」「我都未見過你發嬲喎。咁有啲乜嘢會令你發脾氣？」其實法仔喺香港同我出街時，曾經試過講錯嘢挑動到我情緒，只不過我睥一睥佢佢就識做，好快氹得返我。
我由細到大，都好大情大性——啲同學喺紀念冊都係咁形容我。我易躁，易喊，但都好易氹。情緒嚟得快，又去得快。長大之後，有啲經歷令我覺得：表達情緒唔係一件好事，會令自己被厭棄。我繼而開始壓抑情緒。「我好情緒化…不過大部份時間都撳低啲情緒，到我爆發嗰時可能已經累積咗好耐。」「嗯…我都留意到你好少同我講你嘅感受。」我話：「我覺得你表達得仲少喎！」法仔好少講自己感受。佢曾經話過，唔分享，係因為佢都唔認識自己。
喺我同法仔相處嘅日子，我哋真係冇嘈過交。僅有兩次因為牽涉政治而有啲張力，但主要源自我面對香港困局嘅情緒。喺其他事上面，我哋之間一次爭拗都冇出現過。
2019年2月17號係香港渣打馬拉松。跑齡一年鬆啲嘅我，報咗人生第二個半馬。
對上嗰年我玩咗好多比賽，喺香港同台灣都四圍跑下，當做fun run。當時同前度仲係離離合合，我已經開始寄情跑步。跑步令我得到好多。跑步嘅時候，我心靈最平靜，最享受呼吸、珍惜生命。我曾經幻想可以同前度重新開始、穩定相處。渴望有朝一日，我跑完比賽，會有人喺終點接我，同我講佢以我為榮。最恨可以同鍾愛嘅人喺終點合照留念。
可惜呢啲場面統統冇發生。我甚至聽過一句狠話：「你而家日日夜夜都淨係講跑步，我冇興趣聽。我哋溝通唔到，其實你有冇其他嘢講？」每次賽前我好想聽到嘅「加油」，都係嚟自少數知我有比賽嘅朋友。又咁啱，幾乎每次比賽之前，我都同前度嘈交——或者正正因為我總帶住期望，想得到佢支持，但結果都係被冷言相向，我就因為失望而發爛渣。
今次渣馬之前，我同前度斬咗纜。同法仔未正式一齊，但都持續曖昧中。法仔唔係運動人，我唔預佢會關心我跑步。明嘅，跑步呢啲話題咁悶，除咗自己跑友又有邊個會想聽丫。
我影咗張號碼布俾法仔睇：「我聽日跑半馬。」「半馬好輕鬆丫。」丫佢真係冇概念，唔係扮咖喎。半馬邊忽輕鬆？21.0975km，就算跑完腳唔痛，精神都攰咖。兩個月前——2018年12月——我喺台北跑咗人生初半馬，sub唔到2，但2:00:32都係唔錯嘅成績。跑完之後我行得走得冇腳痛，反而頭痛同眼瞓到死，體力消耗實在太大。
我跑比賽都好平常心。跑界俗語有云：沒有奇蹟，只有累積。平時練幾多，就會收成幾多。今次渣馬，自覺狀態幾好，pb就梗，爭在突破到幾多分鐘。我唔太緊張，但賽前嗰晚依然text法仔：「我開始緊張添…」都係想博人呵啫。佢好快就覆我：「你想唔想我打俾你？」
我唔敢打俾人，怕對方唔想聽，怕對方拒聽。而法仔，再一次喺我開口之前，主動問：
Do you want me to call you?
佢跟手就打咗嚟。把聲好溫柔，好好聽。呢次係我哋第二次傾電話。傾咗個零鐘，我拉完筋、執好嘢，就帶住甜笑進入夢鄉。
未到清晨5點我就要起身。望下Garmin嘅睡眠追蹤紀錄——瞓得五個半鐘，竟然可以有三個鐘deep sleep、兩個半鐘light sleep。睇嚟法仔陪我傾完電話真係令我瞓得好冧。
跑步過程唔詳述，簡言之就係跑得好。跑完拎返部電話，發現法仔喺8點正同我講過加油，只係我寄存咗行李睇唔到。我好興奮咁話佢知我跑得好滿意：「今次係我人生第二場半馬，比起兩個月前喺台北嗰場初半馬快咗七分鐘！」「太好喇！你進步緊！而家你可以喺兩個鐘頭內完成！」我有理由相信佢毫無概念咩係「半馬sub2」，但佢依然陪我雀躍。
「世界紀錄係幾多？」佢真係外行，唔係扮咖喎。邊有人會拎自己身邊嘅人同世界紀錄比？我冇佢咁好氣：「女子半馬拉松世界紀錄1:05:06…」「你只要去啲邊界跑，跨時區跑，就有機會挑戰成功啦！」
佢真係好可愛。明明唔識，又冇興趣，但係會投我所好，亂吹都同我吹幾句。
臨瞓之前，我再次向佢傾訴心中情。
港女：Jamie, you always brighten up my day. :)
法仔：You also brighten up my day, and my night. ;)
（待續）
最近冇咩心機，比較懶散。可以睇住〈我懷念嘅係午後巴黎〉呢個番外篇先。