「怎去開始⋯⋯解釋這履歷？」

寫一首關於你的詩 — — 向招聘嘅公司求職的情詩。

係架，求職如求偶，點樣表達自己嘅誠意、興趣、才華同能力，就主宰成敗得失。求戀期可以係一夜之間嘅短跑，亦可以係數以年計嘅馬拉松，但求職者擁有嘅，就係一紙履歷，或者多一張 Cover Letter 。正所謂「朝中有人好辦事，朝中冇人靠本事」，履歷 (Curriculum Vitae / CV / Resume) 就係向公司索取面試入場券嘅申請書。

「原諒我這一生不羈放縱愛獵頭」

獵頭族，喺中環一帶橫行嗰啲，英文係 head-hunters ，中性啲嘅稱呼係 recruiters 。

佢哋可能係你喺 LinkedIn 上面見到最勤力出 post 嘅 KOL ，唔係講下呢期有咩公司招聘，就係懶好咁分享一啲阿媽係女人嘅求職面試小貼士 (咁我都好肯定佢哋唔會 share 我呢篇文) 。

或者你會以為佢哋好博愛， LinkedIn 上嘅 Connections (相當於 Facebook 嘅 Friends) 冇一千都有五百 (但係冇伍伯──呃。其實 LinkedIn 上…

「如果升職不快樂」

放假自然快樂。

打工仔普遍有個迷思：升職加薪係咪值得高興？理論上係，如果唔係大家唔會見到人哋升職就屈人請食飯或者下午茶。

但係近代流行嘅講法係升職加「辛」，唔係話人工唔加畀你，但係加幅同同辛苦程度唔成正比咁囉。做少少 Cost-and-BenefIt Analysis ，自然明白點解有啲上班族去到某個層次就自覺到頂，拒絕晉升。

「也像我很糾結的公事」

返工係一件好令人矛盾嘅事情。如果唔志在嘅、純粹為搵兩餐嘅、或者返工買花戴嘅，會好冇 motivation ，每朝返工都要輾轉反側千百度，然後時間緊迫冇得食早餐、地鐵迫幾班，壓力一早就飆升，認真落筆打三更。

掉返轉，如果對工作充滿熱情，明明打份工但又當正係自己盤生意，咁樣每個上班日都晨早空氣清新開朗，每次放工可以好似哈姆太郎咁盼待聽日一定更開心。不過咁，任何事情，一旦上心，就註定憂戚與共，冇得輸得贏要、淨係享受快感而毫無壓力或痛楚。

「你是我是我的所有態度」

其實唔係好知吳雨霏《愛是最大權利》嘅呢句歌詞想表達啲乜嘢。正如多年來啲潮流雜誌都好鍾意講「阿邊個邊個好有態度」，即係乜嘢？我腦入面唯一嘅畫面係一個潮人擺出一副臭臉 (港稱「西面」，英文 “bitch face” 大約都係呢個意思) ， that’s it 。

然後，鍾舒漫舊歌《好好擁抱》話「為你好，想因你放下全部態度」。我可以假設，呢度嘅態度包含晒所有尊嚴、自尊心、主見、價值、信念⋯⋯總之一切皆可放低。無獨有偶，以上嘅「態度」都只係喺「你」同「我」之間出現。無論係緊抱定係放下，最終都只係兩個人之間嘅事。

「離開幼稚園，怎可擔心跌損？」

人老咗，就好容易想當然、想當年。例如話，初出茅蘆嘅置記係點樣畀老闆「栽培」，淋水施肥、修剪換盆、插枝分株⋯⋯如果你 visualize 一下、擬物一下，真係有聲有畫面。

而家興講名師出高徒，再冇人講嚴師出高徒。咁當然，冇人講過嚴師教出嚟嘅一定係高徒，亦冇人講過高徒一定出自嚴師，不過係機會大啲啲咁解。而置記一直都感激職場上遇過嘅嚴師，不論佢哋係律己以嚴抑或律人以嚴，跟佢哋出生入死⋯⋯我係話出去見客、圍內開會，都係獲益良多嘅。