「請放鬆，不要緊，成熟最慢」

一個下午，三個曾經同置記共事過嘅實習同事，再次同置記敘首一堂，食餐晏仔。

介紹返，佢哋當中有男有女、長幼有序，大阿哥 Alex 仲早過置記加入當時大家任職嘅部門，畢業之後亦加入返呢間公司嘅另一個部門；二家姐 Bella 係置記親自面試請返嚟，畢業之後去咗另一間同行做類近工作；細妹 Cathy 都係經過置記揀選，而家就快畢業、搵緊工。

佢哋三個背景、性格各有不同，唯一嘅共通點係，曾經 take gap year 做一年實習，算係喺畢業之前執靚自己張 CV 。

「從何時你也學會不要離群」

從何時發覺沒有同伴不行？自從返學開始識同學仔、朋友仔，大家一直都跟大隊過群居嘅生活，就好似動植物公園入面嘅狐猴同合趾猿咁，硬係要三五成群互相捉蚤，或者行住孖咇唱山歌先高興。

當然，畀人杯葛或者排擠嘅事情時有發生，上到大學入唔同學系，唔同成長背景嘅年輕人喺自由選科嘅世界更加冇話冇咗邊個唔得，反正上唔同嘅堂，可以有唔同嘅組員一齊合作，甚至唔使同人合作，自編自導自演又一份功課、又一個學期。

「凡事格外出力」

講啲嘢畀你聽丫。

呢個世界有兩類人，一類識人，另一類識字。由於簡單二分嘅關係，基本上所有職場會有呢兩種人，好少可得一種。

識人嘅同事，可能性格外向、交遊廣闊。佢哋亦可能天生贏在起跑線，例如話屋企本身就係名門望族，伯爺係政府高官、外母係律師樓合夥人、阿哥係科網鉅子⋯⋯總之屋企收埋三五七十個隱形富豪，需要時撲返一百幾十球 (美金啦梗係) 擰一擰個水喉就有。呢種同事並唔係天生含住金鎖匙出世咁簡單，直情係成個社交網絡群星拱照㒓佢，由出世直到永永遠遠，或者家道中落為止。

「甚麼都有底線，為何要忍？」

呢期嘅世界好複雜。國際間有國與國之間嘅拒絕再忍，關於科技企業涉嫌同受制裁國家做生意嘅調查如火如荼；人際間有人與人之間嘅小不忍則亂大謀，關於某議員涉嫌搶去政府官員嘅手機查看內容嘅新聞炒到興合合。咁呢位議員所屬嘅政黨好快已經採取行動，凍結咗事件主角嘅黨籍，黨內大佬亦講到…

「若我難以討好一個人」

難道要怪天主作弄人？

或者你都試過，喺職場上施展渾身解數，為老細做足 100 分，早返遲走、任勞任怨、逗一份糧做三個人嘅工作，將客戶照顧得貼貼服服，但老細始終冇正眼望過你一下，莫講話給予你合理嘅回報。

冇？喂，誠實啲好喎。你從來冇自我感覺 underpaid 或者投訴過老闆偏心其他同事，而明明自己嘅表現、能力同態度都唔差得過嗰啲得老細歡心嘅茂利同粉皮？

「尷尬亦切忌流汗， Ask Hole 」

過兩日我就還。

開港有話做人要不恥下問、虛懷若谷。咁樣先可以求學問，等其他人願意將所知、所識傾囊相授。

放諸金融行業，銀行經歷過一大輪反洗黑錢嘅腥風血雨之後，要求員工 ask the right questions ，面對新客戶要提問適當問題，了解身世、業務以及資金來源。呢啲資訊從來唔會鑿喺個額頭度，要防止銀行體系被不法份子利用，唯有打爛沙盆問到篤。

「人生若是馬拉松，你仲要爆嗎？」

置記唔識游水，人生係少咁啲樂趣嘅。例如話，去沙灘或者 Boat Trip 都要好肉酸地揸住塊浮板，之類。亦因為咁，置記做咗人老豆之後，覺得其他咩嘢興趣班都假，游水唔學唔得。

咁學游水就梗係要循序漸進啦，喺小朋友可以自己捉住浮板、手腳協調咁碧波暢泳之前，游得快定慢、泳姿靚定醜，暫時都唔重要。坊間畀家長同子女一齊學泳水嘅課程，要求嘅只係小朋友肯背浮、踢腳、雙手抓住池邊橫行、跳水之後浮一段距離。

「從那天起我不辨別前後」

15 年前嘅打工仔，同 15 年後嘅打工仔有咩唔同？有，以前返工有咩呻有咩唔順心，一係寫 Blog 一係改 ICQ status 一係喺 MSN 改 tagline 。今時今日？仲唔上 Facebook 開壇作法呃「哭哭」或者「嬲嬲」咩。

社交網絡就係咁偉大。你心底裡有咩說話想講，只要打開心扉擺上網絡公諸同好，真心向明月、明月照溝渠嘅效果快過打針。何況無數人力資源顧問都講過，真嘢唔好攞出嚟講，返工啲八卦嘢更加唔適宜擺上 Facebook ，免得喺同事甚或老闆之間流傳，影響日後仕途呀。