「漸漸我甚麼都不想知道」

黃昏，同事陸逐熄機返歸，起身推凳轉身走，拜拜都冇句。

「很想回到那一天。」

曾經有一段時間，情況唔係咁樣嘅。喺辦公室入面嘅同事們都係有講有笑，有咩不滿攤開嚟講，有咩問題不恥下問，有咩見聞開心 Share 。

然後去到某一日，你我突然靜了。到底係圖書館靜啲，定係一個靜過圖書館嘅辦公室靜啲？我曾經喺圖書館做暑期工，嗰度並唔係你想象中咁靜局，實質上員工整理圖書嘅房間係好熱鬧嘅，閒談笑話此起彼落。

「徐徐遞上這告別信」

置記公司近排發生淺層地震並有多次餘震，人事上嘅變動快過幻彩詠香江啲 laser ，連帶同事都忍唔住問一句：「置記，幾時輪到你？」

喺兵荒馬亂之際，我唯有學似劉華喺《嚦咕嚦咕新年財》入面咁講：「快架喇，快架喇。」心底裡咪又係唔知幾時。

不過返得工，一般嚟講都會有劈炮唔撈嘅一日。既然係咁，不妨又寫下呢個每人都可能想過，但唔係人人做得出嘅動作：遞辭職信。

點解要遞信？

「唔好窮得只剩下錢」

咁當然，唔好窮都好重要。

2018 年嘅香港，冇好似 2014 年嘅翻天覆地，亦冇好似 2016 年嘅爭議不斷。表面嘅和諧平靜，其實可能係大難臨頭各自飛嘅前夕。 But before you go ，始終要搵個方法喺呢個地方繼續生存、繼續生活。

今時今日，返工其中一個主要嘅課題，係點樣 deal with 「新香港人」。無論係海歸定係從北方原裝入口，佢哋始終有著唔同嘅成長經歷，價值觀同一般香港人有出入。點樣相處融洽，或者至少和睦共處，需要多多少少嘅智慧。

「關於波士的問題，請不用提」

如果大家返工未試過講老闆壞話嘅，請舉手並按上一頁離開。

⋯⋯講下啫，唔係咁小氣下嘛？

除非你係個體戶，否則你返得工嘅就總會有個老細督促你、指點你。又除非你公司就只得你同你老闆兩個人，否則你同你嘅同事喺同一級別，槍口通常一致向上，表面上對老闆必恭必敬、唯命是從；背住佢咪又係彈呢彈路，從髮型衣著到言談舉止；從落柯打到畀 feedback ，總之「天下無無不是之老闆」。

「漸漸我聞歌都不想起舞」

大家記唔記得幼稚園嗰份成績表係點樣嘅？唔係印晒白兔仔黑豬仔嗰本喎，嗰本叫手冊。成績表係講緊你中英數常、音樂美術勞作體育表現係點嗰本小冊子。細細個嗰陣，成績表由一張 A4 紙對摺而成，懶係保障你私隱咁，到中小學就直不甩一張 A4 紙，你鍾意摺、鍾意捲、鍾意入 folder 都適隨尊便。

我最記得，幼稚園成績表有操行分，可以細分到守時、守秩序、愛清潔等等。置記五歲前都算品學兼優架 (我冇話五歲之後唔係，少咗個人變咗品學兼「憂」啫) 。喺「優良常可劣」rain 五級制入面，幼兒版置記各方面都非優即良，唯獨是「合群」一項，好似常常都係「常」。