黑馬王子跑出 英軍超額完成

世界盃準決賽第二場，由英格蘭對克羅地亞。隨住法國以一個死球 (以及四平八穩嘅踢法) 氣走比利時，無論「三獅兵團」抑或「格仔兵團」打入決賽，都會扮演 underdog 嘅角色。英格蘭今場獲編配著主場嘅白衫，克羅地亞著作客嘅黑色波衫，符合佢哋「黑馬」嘅角色。

克羅地亞連續兩場淘汰賽都踢足 120 分鐘，先至憑互射十二碼擊敗丹麥同俄羅斯，但球隊正選名單大致維持不變，只係由波索域取代卡馬歷，加強中場控制力。英格蘭繼續沿用 3–5–2 (或說 3–3–3–1) 陣式，以史達寧輔助哈利簡尼攻堅。