之前幾篇都係講啲投資 (Investment) 相關嘅理念,今次轉入另一個 I – Insurance 。其實大家可能會諗起早前我寫過嘅兩個題目:對沖及衍生工具,尤其是 CDS 。冇錯,保險呢兩個字,可以狹義地理解為一份合約、一份保單,亦可以好廣義地解作一切控制、管理風險及潛在損失嘅方法。
每個人身邊,都總有啲朋友係冇乜偏財運,麻雀檯上十賭九輸,股票短炒高追低沽。置記本身就係一個人辦。交咗咁多年學費,我總算有啲自知之明,戒絕短線炒賣。不過即使係長線投資,我對自己入市嘅時機都好缺乏信心,凝住每次入場都會摸頂,摸著巴黎鐵塔個尖頂,唔痛就假。要轉移時機 (market-timing) 嘅風險,最好嘅方法莫過於定期入市,無論春夏秋冬、陰晴圓缺,定時定候買入個別股票,剩低嘅風險就係揀錯股 (抵死啦咁) 同埋落錯車。