「識揀一定唔做 Retail 」

香港係一個好有趣嘅地方，做銀行好似係一種身份嘅象徵咁。以前銀行 teller 妹仔被有錢人家公子哥兒 (或者佢哋老母) 睇中娶做老婆 (或者新抱) 係都市傳說，早幾年「銀行家，正人渣」嘅錄音傳遍整個中環，但歷久不衰嘅，係銀行界薪高糧準福利好嘅形象。

當然，你睇我好、我睇你好。相比起其他行業例如話零售、旅行、飲食等，銀行工的而且確係相對地穩定而又待遇唔差嘅。問題係，人類選擇總係傾向自己熟悉嘅優先，例如話揀銀行工就例牌揀咗啲家傳戶曉嘅品牌，如果仲要做著大家最貼身嘅零售銀行 (Retail Banking ，或個人銀行 Personal…

「 IT 人，你的犧牲很有用」

一年容易又清明 (乜唔係中秋？) ，意味住各大金融機構派花紅、加人工嘅數字公諸於世。以呢行作為經濟寒暑表嘅話，大家日子的確有點兒難過。早兩三年都仲話普遍加 3% -5% 跑贏通漲，花紅都個幾月至三個月不等。 2017 年，好似將啲數字除二就差唔多，有銀行界朋友戲稱，每個月加嗰雞碎咁多，夠食餐晚飯咁多多。

銀行業冇以前咁好賺，一來收益增長放緩，有湊公司客嘅 RM 講，一啲大陸客本身水浸，借錢自然審慎；二來另一啲大陸客周轉麻麻地，銀行為 bad debt 撥備手鬆極都要撥架，呢啲喺各大行財務報表都反映咗；三來 ETF…

「扮工不如辦公」

俗語話「識人好過識字」，意思係你有人際關係，勝過有實質才幹，從搵工到喺職場打滾以至做生意都無往而不利。

因為咁樣，好多人都會目標為本，返工就「以人為本」，一心諗住氹得掂老細就衣食無憂。久而久之，揣摩上意變成習慣，辦公變成扮工。

呢種現象，又以冇數跑、不以數字論英雄嘅場地最為普遍。或者有人會諗，唔使跑數咪冇咁大壓力囉。但作為一個曾經滄海嘅人，我覺得有數跑，總好過冇。

「留一步，誰都好」

轉工，有如分手。擺明係你飛人，喺你拎咗辭職信出嚟嗰一刻，你就有心理準備，對方會有 hard-feeling 。

而喺遞信之前，由於收信嗰個一般係你老細，即係大粒過你、有權有勢過你，忐忑不安係好正常嘅現象。

除非你東急阿雪 (don’t give a shit ，出自黃子華) ，話之對方一哭二鬧三上吊 (雖然通常唔會) 。但我會勸你唔好。

「還可以著甚麼？」

返工著咩衫，從來都係一門學問。

有制服嘅，都可以喺手錶、皮帶、皮鞋呢啲細節度發揮創意。

​女人喺頭飾、首飾、手飾等飾物嘅選擇就更加多到可以令人傾家盪產。

問題係，有一個界限係比較難突破嘅：你老闆。

打從 day 0 開始，你老闆就已經約束住你嘅衣著。好似我咁做文員仔嘅，有邊個唔係工整地西裝筆挺、打撚埋呔去見工以示專業同誠意？如果有態度、有風格地唔打呔或者戴袋巾，風險完全閣下自理。

「人在置地斷捨離」

今日同一位來自紐西蘭嘅朋友食飯，大家都係金融中人，都係嗰啲三十出頭事業唔上唔落嘅中年男子，傾偈傾嘅都係離不開工作、家庭同埋生活。

朋友話，佢同佢太太都好鍾意香港，好樂意喺度長住。不過最近佢哋去過新加坡幾日，算係探下路了解下當地情況。原本唔鍾意新加坡嘅太太，喺一次旅程之後覺得原來新加坡都唔錯。第時如果工作需要轉移陣地都可以諗得過。

我話，我唔知點解西方社會嘅人地域流動性好似特別高啲，華人要去外國做嘢好似冇咁容易。佢話，「唔係丫，英國都好多 Chinese 同 Japanese 架喎。」

「重組原是永恆」

置記潛咗水幾日，主要係因為幫完朋友做兄弟，要回氣。以後如果邊位朋友想我寫少兩句，結婚搵我幫手就得架喇 (誤) 。

話說回頭，近排聽聞有啲朋友因為公司架構重組而各散東西，聽落好似好欷歔咁，但諗深一層，其實都係自然現象，同春天起霧、秋天落葉差唔多。

講多少少背景。銀行界企業規模郁啲就一千幾百人，工種分到好細好細。咁從內部控制 (internal control) 嘅角度嚟講，一本 Procedure Manual (工序手冊) 係必不可少嘅。

「我們，總是舊情人」

我舊老闆同我呻，話近年嘅畢業生身在福中不知福。

佢話，明明公司有晒 well-structured 嘅 development programme 畀佢哋，即係啲 Management Trainee 、 Graduate Trainee 、 Associate Trainee 之類。有啲仲要喺事業上 fast track 咗，快人一步，但人心永遠不足，永遠隔離飯香。

「情願明天從頭做起」

「我覺得你呢個係 good move 丫！」
「All the best!」
「出咗去唔好望返轉頭！」

每個人轉工，都期待聽到朋友、同事、家人嘅祝福。雖然世界上冇太多人會潑冷水，但我都真係聽過有老細同個遞咗信嘅員工講「好自為之」。

最近我轉工，聽得最多嘅係「喺新地方重新開始」。聽落係祝福，㗳落覺得有啲怪怪地。即係點呀？忘掉種過的花，重新的出發，放棄理想吧？花就係花，敗柳殘花嗰個花。

「但學費都真的太貴」

如果，沒有初戀感動經過⋯⋯。

如果冇上一份工嘅經驗，你唔會有下一份工。

​但如果你帶住上一份工畀你嘅成功感同埋自信心 (簡稱「沾沾」) 去返下一份工，咁就除咗恭喜都唔知講咩好喇。

Gundam 嗰個阿寶話人類總要重複相同嘅錯誤，葉念琛導演下嘅阿寶就由獨家試愛到婚前試愛到失戀日。其實我一套都冇睇。但記住唔好重複犯錯其實唔夠，唔好強求複製上一次嘅成功，同樣重要。

「腐乳紙與舊老闆」

你人生最早一段記憶係幾時嘅事？我記得，好似係兩三歲嗰陣去沙灘，見到個泥鏟賴低咗喺沙灘，跟住一個浪飄走咗。我冇有識死走去執，結果跟住一個更大嘅浪冚埋嚟，我斷片。

咁當然我最後係被救返嘅。唔係你而家睇緊啲乜？但嗰個時期嘅其他嘢，例如話幼稚園喺學校門口 BBQ 、著到成隻兔仔咁喺家長日表演之類，即使有相為證都尚且唔係好記得，當年冇數碼相機，格格菲林都係錢，所以更多嘢係冇憑冇據地，唔記得咗。

「讓我慳啲慳啲！」

今朝朋友 send 咗個網頁仲要 tag 我，篇嘢劈頭就話「當你一畢業冇耐就月入五至十萬，出入 Landmark 與四季酒店⋯⋯」

而其實我想講，喺置地 high tea 、 shopping 同返工係唔同層次嘅事。作為一條毒撚，喺中環嘅核心嘅內圍返工，食晏嘅開支可以係一個煩惱。

唔信？我計條數畀你睇。

首先假設你唔係日日都帶飯返公司食嘅朋友。因為咁樣做嘅機會成本係做獨家村，同外界斷絕來往。呢條數，比較難計。