仲有一日多啲， 2018 年就成為過去，亦標誌我喺 Medium 嘅第一個 full calendar year 完結。究竟，今年置記 (同埋賴叔) 喺呢度做咗幾多嘢，成績又係點呢？
多得 Medium 相當之友善嘅統計數字介面，我用 Excel 搞兩搞就得出一個基本概念。唔計呢一篇回顧， 2018 年嘅統計數字係咁嘅：
- 出咗 135 篇文章，平均每月 11.25 篇，即係約莫兩三日一篇。
- 最高產量係六月同七月，分別有 19 同 22 篇文。點解？世界盃囉。都寫咗十幾篇架。
- 最多人睇嘅文章有兩篇：「當財記遇上 Dickson」同埋「域奇．王維基回信」。兩篇都過萬 View 。共通點係，兩者都係第一季出嘅。第二季打後， somehow Medium links 透過 Facebook Page 發表的 reach 係低咗好多、好多嘅。當然，我減少咗追逐一啲 hot topic 去寫文，文章較少喺 Facebook 廣傳，都係原因。
- 最受歡迎 (fans) 嘅文章：過咗30歲，最需要學嘅，係做人。超過 150 個朋友拍過手，我諗佢哋當中好多都過咗 30 歲。
數字講完，當然都應該分享一下我嘅觀察：
- 想文章多人睇或者廣傳，第一戒係講自己嘢。即係，冇公共性嘅文章，純粹自己寫嚟放負嘅文章，通常都唔慌收得。第二戒，唔好寫體育，即使係世界盃呢項盛事，真正會睇賽後報告或分析嘅人其實唔多。
- 掉返轉，講一啲 layman 到爆廠嘅話題，例如話「怎去開始⋯⋯解釋這履歷？」、「Excel 防柒六件事」呢類型「實用文」，就比較多人睇。
- 有時候，深度文或者技術文唔係冇人睇，但係 Read Ratio 可能會比較低。 Medium 唔識計中文文章嘅 reading time ，但係照樣會推算返用戶有冇喺你篇文度瀏覽足夠嘅時間，所以 View 純粹係入去， Read 先係有足夠逗留時間。八篇 Read Ratio 50% 或以下嘅文章入面，「人生財技」系列佔咗四篇，加埋當梵蒂岡遇上衍生工具，金融普及文佔 Read Ratio bottom 8 共五個席位。
- 由於我而家啲文絕大部份都係 set 咗 paywall ，而免費用戶一個月三篇免費文章嘅配額肯定唔夠睇我一個月十幾篇，所以，我估呢度都局限咗我啲文嘅接觸面。
一年過去，置記透過 Medium 都認識咗一啲勁人，睇咗幾部幾好睇嘅連續小說 ，包括《當首爾仍是叫漢城的那些年》同埋《北角演義》 (H Fung 我得閒出 invoice 問你收返廣告費)。喺呢度磨墨，同以往 freestyle 吹水講政治時事比較，係有少少唔同。畢竟我希望《職場心經》系列有主題同埋少重複。呀，同埋我係會將喺 JobsDB 地盤嘅文延時放埋喺呢度嘅。
至於中年危機、親子育兒、遭逢巨變、放負能量、演唱會後感之類嘅作業，就會擺低喺《賴叔睇育》系列嗰邊。寫足球嗰啲都係喺嗰邊。冇乜特別主題，都係自由放牧 mode 居多。
2019 年，我唔知我嘅生活會變好定係變得更差。寫作，就好似中學嗰陣嘅抄歌詞咁，算係一個逃生出口。一係就將啲情緒倒晒落去，一係就畀自己出去一下扯返兩飛先返埋位。「為何要相信，這裡會有希望」？因為如果連希望都冇埋，咁就真係邊度都唔使去咯。
預祝各位新年進步。
