Prompt

Design of minimalist logo featuring a Young Boy with Hat on a white background. Include lines as an additional design element

MidJourney 5.2

其實使用MidJourney所產出的結果已經符合一般網站或設計使用，有一點點Notion的風格。

NijiJourney

在MidJourney有定稿後，嘗試一下用NijiJourney加添日本動漫風格。而NijiJourney入面可以再細化4種風格，例如比較傳統日本動漫的Original Style、渲染度較強且傾向3D化的Expressive、可愛2D風格的Cute，以及帶電影感的Scenic。

有Logo/Icon設計上，未必能完全體現以上4種風格的特點，有機會跟大家分享。

Original Style

Expressive Style

Cute Style

Scenic Style

分享有關AI、AICG、商業、思考

[MJ Style #0001] 一分鐘時間，設計自己的簡約Logo吧！ was originally published in 潮童如是說 on Medium, where people are continuing the conversation by highlighting and responding to this story.

呀，應該係總結我係東京食拉麵/沾麵類嘅地方

らぁ麺 はやし田 (新宿)
Tabelog 分數：3.84
短評：以特調醬油做底，混合土雞嘅鮮甜、鴨嘅鹹香，再加上鴨油，味道一層層咁推埋一齊，驚為天人！
詳細報告：打開 潮童焗飯Facebook Page

楽観 Gold (六本木）
Tabelog 分數：3.61
短評：清湯醬油，配搭洋蔥粒，咸咸甜甜，麵條有咬感

鴨to葱 （上野）
Tabelog 分數：3.59
短評：鴨湯拉麵，湯底清徹香甜，配搭鴨肉濃味，一絕

ARUFI （多間分店）
Tabelog 分數：3.5x （視乎分店）
短評：嗌左清爽版既柚子鹽湯底，幫自己Refresh一下

神保町 黒須 （神保町）
Tabelog 分數：3.59
短評：鹽味湯底，湯底透徹偏黃，帶上雞油同貝既味道

つけ麺 五ノ神製作所 (新宿)
Tabelog 分數：3.78
短評：咁得意既，點解有堆青醬，同有塊麵包係到呢？唔理著，將一著沾麵放入沾湯到點一點。唔，蝦味同蕃茄味竟然分處兩個Layer互相輝映，唔會互相搶味；沾麵呢，無論掛湯度同彈牙度都好理想，十分滿意。
詳細報告：打開 潮童焗飯Facebook Page

金色不如帰 （新宿）
Tabelog 分數：3.86
短評：醬油湯底用上多種貝類、醬油、豬、魚、菌菇類熬煮而成，鮮甜味爆燈，又一非主流湯底代表作。不過麵底就麻麻，太淋身唔夠彈牙。

銀座 篝 （銀座）
Tabelog 分數：3.62
短評：豐厚鮮甜，濃郁雞味，慢慢將配備既生姜蓉、炒洋蔥乾、黑七味粉、有機玄米醋一層一層加上，感受底層味道既變化

麺屋一燈 （新小岩）
Tabelog 分數：3.87
短評：「特製沾麵」，奉上一碗濃厚魚介豚骨沾湯，挾起沾麵，浸一浸再吸入，柴魚及豚骨味湧入口腔，成件勁度十足。無論係味道之重，還是麵條之紮實，可以話係成個旅程之最。值得一提，半熟玉子非常入味，流心度高，值得一讚。

潮童焗飯 — 東京拉麵/沾麵集合帖 was originally published in 潮童焗飯 on Medium, where people are continuing the conversation by highlighting and responding to this story.

那些年我吃過的熟成牛、熟成魚、熟成豬

「多磨，中拖拿熟成醬油漬。唔洗點豉油，就咁食，請慢用。」 長期Poker Face嘅武師傅如是說。

等等先，武師傅，唔好見我第一次幫襯就水我。中拖羅就中拖羅，醬油就醬油，呢舊係咩傢伙嚟先？同我解釋下先好走呀。

近年因緣際會，有唔同機會接觸「熟食料理」，就好奇小寶寶上身，研究下呢樣野係咩嚟。喺到唔諗著講生物學，扔一推科學專有名詞（主要係我都唔識），只想簡單分享下，等大家有個概念自己食緊咩，點解舊肉好食左，同埋價錢貴左。

簡單嚟講，熟成（Aging），一種肉類處理方式嘅統稱：將肉類放係適當溫度同濕度下，利用肉類本身自帶嘅酵素以及外在微生物發酵，提升肉類風味，令肉質更為軟嫩。

先以大家較為熟悉，而市場亦較普遍食到嘅牛肉為例子，主要分為：濕式熟成（Wet-Aged）同乾式熟成（Dry-Aged）兩種。

濕式熟成（Wet-Aged）

相對而言，Wet-Aged Beef較為經濟實惠，用真空袋裝著需要熟成嘅部位，喺冷藏運送途中，就可以利用牛本身天然酵素進行熟成，令風味改變，肉質變軟。

乾式熟成（Dry-Aged）

Dry-Aged其實源自舊時冷凍技術未發展時，人類打獵後將未食完嘅肉放係自然環境中風乾，令牛肉風味更佳而發現。去到現代，通常我地會將牛肉分切，再放置係恆溫恆濕環境下，利用牛肉自帶天然酵素進行熟成。

頭先話Wet-Aged較為經濟實惠，咁Dry-Aged當然會令成本提升啦。點解呢？因為Dry-Aged後，牛肉表層肉及脂肪因為失去水份而變硬，最後需要放棄，約佔一整舊肉嘅30%。又要時間，又佔空間，熟成完仲剩返70%可以食，咁你明點解價錢較為貴啦？

香港人不嬲都鍾意海鮮類食物即劏即食，不過呢，既然係開頭嘅用左「中拖羅醬油漬＠武館」嚟做引旨，「熟成」呢個概念當然可以用係刺身之上。

追溯返江戶時期，日本人同樣面對冷藏問題。由出海捕魚，上岸落貨，到餐廳下廚呢段時間，可能長達幾日，咁點保持所謂嘅鮮呢？活締處理係其中一個方法，不過並唔係每一條魚都適合。而另一種處理方法，就係用鹽、醋、昆布，或醬油等將魚肉醃起保存保鮮；另一方面，魚肉經過一段時間靜置後，亦可脫離「屍彊」狀態，筋肉分解令肉質鬆軟、風味更佳。

昆布熟成

常用於白身魚上，例如鯛魚。做法大概：用清酒抹乾淨昆布，另一面為魚生噴上冰鹽水，然後以昆布包著魚肉放置一定時間。完成後，魚肉結實更有咬口，而味道亦更為濃郁；

鹽醋熟成

可以話係大家最容易食到嘅熟食方法，點解？因為大家耳熟能詳嘅鯖魚壽司就係當中代表。奈良時代，日本天皇以京都為首都，因為禁肉令同地處內陸關係，無咩好揀，唯有命人山長水遠，係北面城市「小浜」人肉運送到京。不過，時間需時數日，魚肉好大機會中途變壞發臭，所以就發明左灑鹽保鮮，為魚肉帶嚟微酸味道，是為「鯖棒壽司」（箱押壽司嘅朋友，主要係形狀唔同）。

醬油漬熟成

最後要介紹就係呢種 — 「醬油漬熟成」！以我接觸到嘅拖羅為例，師傳將魚肉放入秘制醬油（可能為醬油，煮油，昆布，木魚等混合而成）保存，一方面保存油香，另一方面亦令肉質鬆化。味道？我試過食到Blue Cheese嘅味道。你點睇？

其他物種

喂，咁除左牛同魚，其他肉得唔得先？咁緊係得啦，只不過係你有機會食姐。我自己就係中環Porker試過熟成豬肉「鹿兒島熟成三元豚肉」；亦都見過人地介紹過熟成鴨肉，不過未有機會食（哭哭）。

今次寫到呢到，有機會再寫寫筆記，同大家介紹我嘅飲食歷程。

如果你覺得好睇嘅，請給我1個掌聲作為鼓勵；
如果你想我再寫嘅，請給我2–5個掌聲作為鼓勵；

擺耐左，仲好食過即劏即食 was originally published in 潮童焗飯 on Medium, where people are continuing the conversation by highlighting and responding to this story.

香港・大坑．割烹料理

OK，兌現承諾時間，今日先介紹位於大坑，定義自己做「割烹料理（Kappo）」嘅居酒屋 — Kona。

喂，等等先，咩係割烹料理呢？拿，以我嘅理解，應該要符合幾個條件：

- 採用季節性新鮮食材，而且可以發揮食材各項特性；
- 客人成餐飯可以見到師傳處理同烹飪食材嘅過程；
- 師傅精通所有日本料理手法，甚至即時根據客人要求而微調料理；

簡單嚟講，不時不食，又睇得又食得！

講返正題，係機緣巧合下知道呢間餐廳嘅存在，而我咁啱又約左個日本通前輩食飯，就膽粗粗嚟一試究竟。成餐一共嗌左11樣單品，係到揀幾樣野同大家分享：

- 海膽．龍蝦湯啫喱：表層放上北海道海膽，底層用上以龍蝦高湯啫喱，賣相精美，鮮甜對鮮甜；中間再混入少量飛魚籽，添加口感，十分完整嘅一道菜，同前輩一人一杯；

- 鵝肝．芝士．最中餅：最中餅，係日本甜品嘅一種，食落有啲我地熟悉嘅威化餅，香脆可口。廚師將鵝肝同芝士混為一體，內濃外淡，有趣之作。如果層次多豐富一兩層，效果更妙；

- 澳洲和牛腹膜肉．芝士蛋黃醬：牛腹膜肉軟韌，油香十足，配上鮮濃嘅蛋黃醬，狠狠地對味覺揮一下重拳。個人意見，中間加上少量紫蘇葉，或者七味粉，將重拳變做做組合拳，完整度更高，食落更加無還手之力；

呀，補充小小，師傅話開張未夠一個月，好多野佢地仲試緊摸索緊，所以好主動問客人對每樣野嘅意見，睇下可以點樣改進。

我舉個例子，食到去縞鰺刺身．麵豉醬（常見做法），我覺得麵豉味太重，魚味唔夠出，突然腦洞大開：話下次不如落一兩滴青檸汁調調味，師傅二話不說再切個青檸仔出嚟，同我地一齊試Work唔Work。呢個位值得一讚，而呢種體驗，亦係食割烹坐Bar枱嘅好處同意義。

嗌左12野樣，埋單每人大概比$600 — $700，係食物質素、師傳手勢、服務質素、環境裝修各方面嚟講，絕對收貨。

潮童Playlist

1. 白毛豬火腿配冷制炭燒茄子
2. 海膽．龍蝦湯啫喱⭐️
3. 鵝肝．芝士．最中餅⭐️
4. 澳洲和牛腹膜肉．芝士蛋黃醬⭐️
5. 牛舌．香蔥芥末味噌
6. 伊比利亞豬肩肉照燒❌
7. 縞鰺刺身．麵豉醬
8. 瞬間薰製日本雞頸肉
9. 手羽先唐揚
10. 松葉蟹忌廉餅⭐️
11. 特製壽喜燒風夏松露牛丼

有樣野差啲唔記得講，如果餐廳有提供柚子雪芭之類嘅野作為Ending，收錢又好免費又好，就Perfect池。

Kona

電話：2881 6339
地址：大坑蓮花宮西街16號

如果你覺得好睇嘅，請給我1個掌聲作為鼓勵；
如果你想我再寫嘅，請給我2–5個掌聲作為鼓勵；

味道交響曲 — Kaon was originally published in 潮童焗飯 on Medium, where people are continuing the conversation by highlighting and responding to this story.

和牛黑手黨Wagyumafia姐妹店，貴價尾崎牛沾麵現登陸香港灣仔

近期風頭一時無兩，可以話係呢間和牛沾麵店 — Mashi No Mashi。呢間鋪頭嘅來歷我就唔多講，Google一下好易搵到，唔洗我寫。

星期五晚嘅關係，由自助售票機買野食，到入座上菜，歷時接近90分鐘。首先出現嘅，當然係師傅招牌Chok著上菜，你唔影下都真係唔比面啦？

特製和牛沾麵，沾麵偏粗身，煙韌有嚼勁，合格；沾麵汁用上牛骨及各式醬油熬製，味度厚度屬於正常範圍；兩片和牛屬於尾崎牛，用上牛腩部位，經火灸處理，嫩滑鮮甜，但我嫌佢唔夠肉味，兼未有剔走所有筋。對於一家以和牛專家自居嘅店，要扣分。

150g沾都真係唔多夠，加多碟和牛餃子就差唔多。以牛肉、韭菜、椰菜作餡料，煎到上軟下脆，反而令我驚喜。

想試下特色拉麵，襯下墟嘅話，咁我覺得可以一戰。

老老豆豆，$160一碗沾麵，$120/6隻餃子，性價比真係一般，仲要排成個鐘先食到，咁我不如返我最愛拉麵鋪食啦。

提多一樣野，鋪頭唔收現金，暫時只收八達通，Credit Card 只係收有Paywave功能嘅Visa/Master，自己做好準備。

拉麵/沾麵地圖同步更新: https://airtable.com/shrQxgUwBvcYXgmwD

如果你覺得好睇嘅，請給我1個掌聲作為鼓勵；
如果你想我再寫嘅，請給我2–5個掌聲作為鼓勵；

大Chok特Chok — Mashi No Mashi was originally published in 潮童焗飯 on Medium, where people are continuing the conversation by highlighting and responding to this story.

你以為我會全日都食咁淡口味？我會嘅話就唔姓潮！

遊歷完清水寺-祗園一帶，唔知痴起邊條筋，轉戰京都拉麵競爭區域 — 一乘寺。一乘寺係咩地方？就咁係Tabelog到掃一掃，呢個區域嘅拉麵店隨隨便便都係3.5分或以上，比如話：極雞、池田屋、亞喜英、高安等等。

而今次揀嘅極雞，現為3.67分，以重口味雞湯拉麵聞名。望著一堆睇唔明嘅日文字，亂估無痛苦咁揀鶏だく + 玉子かけご飯（我真係睇唔明係咩），盛惠1,000yen。

首先上枱嘅唔係拉麵，而係生蛋飯，即係我睇唔明果舊野 Lol 好啦，襯碗飯仲係熱，拿拿聲打隻蛋再倒埋配料舊去撈一撈。正想食一啖之際，碗麵就嚟啦。

等等先，我嚟唔係食拉麵嫁咩，因咩事個湯濃稠到拌麵咁樣？無錯啦，呢碗就係招牌菜 — 原味濃厚雞白湯底拉麵，完全用雞骨熬製，湯底「杰」到好似芝麻糊咁，不過飲落意外地唔油唔膩，配合粗身麵條，每夾一著入口，都感受到濃厚雞味，非常好食。

夾夾下，無麵條嘅？原來已經食哂，好失落。好彩，我仲有碗生蛋飯，倒埋落剩返嘅湯到再砌過，好滿足。

麺屋 極鶏
地址：京都府京都市左京区一乗寺西閉川原町29–7

麺屋 極鶏 (修学院/ラーメン)

如果你覺得好睇嘅，請給我1個掌聲作為鼓勵；
如果你想我再寫嘅，請給我2–5個掌聲作為鼓勵；

[京都] 重口味．呢碗係撈麵定拉麵？麵屋 極雞 was originally published in 潮童焗飯 on Medium, where people are continuing the conversation by highlighting and responding to this story.

經歷完尋日天橋立嘅長征，今日真係hea下，係清水寺-祗園一帶散步就算。

第一站，先到高台寺，附近嘅ひさご，簡簡單單食個早餐（時間係12：30）。唔該，要個丼飯。上枱，滿滿嘅半熟蛋汁，滑嫩而味道濃郁，加上丹波雞雞腿肉，九条蔥，一碗簡單嘅母女丼已經心滿意足。

價錢1,010Yen，以親子丼嚟講算貴，以午餐嚟講算正常，以好西嚟講算抵食。加多150yen可以加大份量，不過唔太建議，有空間嘅話不如去附近邊行邊掃街？店鋪位置行去高台寺同清水寺都好快，數之不盡嘅小食等緊大家。

ひさご
地址：京都府京都市東山区下河原通八坂鳥居前下ル下河原町484

ひさご (祇園四条/親子丼)

食完母女丼，行左轉高台寺轉轉運，係時候坐低休息下，扮扮文青。決定係你啦，老細極力推介嘅 — 高台寺 洛匠。

先講洛匠第一賣點，亦都係老細推介嘅原因，就係草蕨餅。草蕨餅係咩野？Google大神話比我地知，即係蕨根部取出的澱粉加上砂糖和水而成嘅日式和菓子，歷史嘅野就唔好理啦，有得食就ok。

口感煙煙軔軔，有少少抹茶味，配以黃豆粉甜甜嘅點啜，唔錯唔錯。大家黎到千祈唔好比其他雪糕芭比迷惑，草蕨餅以外都係邪道！

呢到第二個賣點就係園景。鋪頭用左一半空間嚟設置園景，有樹有石仲有一池鯉魚，香港人呢世應該都唔會明呢個係咩玩法，擺多幾個位咪仲好？Any肥，今日好好彩，係有陽光嘅時候嚟，坐係窗邊，悠閒食個Tea，呢種慢活節奏已好經好耐無享受過。

高台寺 洛匠
地址：京都府京都市東山区高台寺北門前通下河原東入ル鷲尾町516

高台寺 洛匠 (祇園四条/甘味処)

如果你覺得好睇嘅，請給我1個掌聲作為鼓勵；
如果你想我再寫嘅，請給我2–5個掌聲作為鼓勵；

[京都] 高台寺．母女丼．草蕨餅 was originally published in 潮童焗飯 on Medium, where people are continuing the conversation by highlighting and responding to this story.

京都嘅第一晚，接續五行拉麵行程。

話說頭先食完個拉麵先至八點幾，無理由就咁返酒店嫁，所以就即刻附近有無酒吧可以比我飲杯野，感受下京都嘅另一面，咁又真係比我搵到河原町附近有間堅料 — L’Escamoteur。

L’Escamoteur，無論係裝修，定係佢地老細，都充滿著魔幻神秘色彩，感覺好似同外界暫時斷絕，身處第三空間放鬆一下咁。而且，Cocktail 質素一啲都唔失禮，我自己嗌左杯「Kumo」嚟飲，用上士多啤梨、荔枝同唔知咩咩叉叉咁，飲落好舒服。

其實呢，呢到既招牌飲品係「Old-Time Atmosphere」，好唔好飲我唔知，不過視覺效果一流，每次法國老細都好似變魔術咁（即係第一張圖），唔飲得都影得呃得。

鋪頭得十二個位，而又真係好多人去，所以有興趣嘅朋友，祝你好運。

L’Escamoteur （レスカモトゥール バー）
地址：京都府下京区西石垣通四条下ル斎藤町138番地9 ２階

レスカモトゥール　バー (京都/バー)

如果你覺得好睇嘅，請給我1個掌聲作為鼓勵；
如果你想我再寫嘅，請給我2–5個掌聲作為鼓勵；

[京都] 喂，個Bar Tender魔術師嚟嘅！ L’Escamoteur was originally published in 潮童焗飯 on Medium, where people are continuing the conversation by highlighting and responding to this story.

今次關西之旅，先到訪京都。第一晚，我揀左五行 GOGYO，一間特色拉麵店。唔，其實嚴格嚟講五行係一間居酒屋，裝修新穎型格，不過招牌菜式焦燒醬油拉麵太過出位，令人不自覺忽略其他單品，而當佢係一間拉麵店。

因為坐Bar枱嘅關係，未嗌野食，師傅仔開大火炒嘅時候，已經聞到果陣招牌焦香味。

碗麵上枱之後，靠近聞更加不得了。即刻飲一啖，點會諗到一碗望落去漆黑一片嘅湯，竟然可以將鹹香混合甜味，型成一陣獨特鮮味？而且，湯底油膩度屬於正常，隨時少過平日香港食嘅豚骨湯底拉麵；配搭上掛湯度唔錯嘅粗身麵條，夾一啖麵上黎順便飲口湯，唔錯。

提提大家，鋪頭有個奇怪規定，每位有400Yen Table Service Charge，雖然佢會比返碟小食（我今次係免治雞肉丸），不過真係唔那Chur。有人話，因為五行屬於計居酒屋類別，而居酒屋有收入席費呢個習慣，咁我就唔知啦️？

五行位於四条河原町，錦市場附近，交通亦都方便。如果大家有勇氣接受新事物，不坊一試。

京都 五行
地址：京都府京都市中京区柳馬場通蛸薬師下ル十文字町452

京都 五行 (四条/居酒屋)

如果你覺得好睇嘅，請給我1個掌聲作為鼓勵；
如果你想我再寫嘅，請給我2–5個掌聲作為鼓勵；

[京都] 你碗麵燶左呀！五行 GOGYO was originally published in 潮童焗飯 on Medium, where people are continuing the conversation by highlighting and responding to this story.

平等還是公平？我們應該怎樣去管理會員，你的忠實客戶

在行銷，或者準確而言，在客戶關係管理 (Customer Relationship Management, CRM)上，常常提到要分辨你的客戶：誰是高價值客戶？誰又是低價值客戶？

然後呢？往往就沒有然後了。即使品牌設立會員制度，但為了吸引顧客上門幫襯，線上線下所有通路也派發優惠券，希望可以觸及整個市場的潛在客戶。換個說法，就是一視同仁。不論是新顧客，舊顧客，甚至忠實客戶，全都享同共樣的福利，多麼的平等哦！

但是，這樣好嗎？

顧客的價值在那？

以較熟悉的餐飲業為例，客戶的價值在於消費，而不是Reach或者Like（當然，個人而言好支持LikeCoin），習慣以平均單價（Ticket Average）或人均消費（Average Check）作為顧客貢獻指標。

在這裡虛構一間「Modern Child Bistro」作為說明。

小小背景資料，這是一間由西人開設的餐廳，人均消費由$80到$150不等，每個顧客群通常由2–3人所組成。透過會員系統所取得的數據，我們可以界分出兩組會員顧客群，並列出一些基本數據，如下圖；

左面的William是第一組會員顧客代表，平均單價為$258.15；右面的Ivy是第二組會員顧客代表，平均單價為＄246.59。以單次消費而言，William消費能力較高，餐廳應該更歡迎他們光顧。

不過，以單次消費為準則太過片面，通常我們以「終生客戶價值 Lifetime Customer Value」作為準則。我們嘗試加上時間性，例如一年，再次觀察不同會員顧客的貢獻：

• William一年平均光顧1.83次，年消費金額為＄472.41；
• Ivy一年平均光顧8.07次，年消費金額為＄2,006.28，比前者貢獻高出4倍。

假設這兩組會員的取得成本（Acquisition Cost）一樣，Ivy一組的回報無疑更高，所以我們亦應該把資源傾斜，留著Ivy這組會員顧客。

消費 = 頁獻？

消費金額的高低當然對貢獻度有影響，但並不是全部，亦不應是全部。

一個成熟的會員制度，應該加入各項合乎公司需要的元素作為量度指標。在現今講求 Social 的年代，每一個顧客都可能擔任品牌傳教士（Evangelis）一角，在線上線下向認識及不認識的人宣傳你的品牌，為你省下一筆宣傳費用，而說服力比你的廣告更高。如果他們是 KOL 或Micro-Influencer， 那麼恭喜你，中獎了。

平等？還是公平？

如果品牌一視同仁，對兩組會員提供一樣待遇，一樣優惠，一樣折扣，公平嗎？很多時候，我們誤解了公平一詞的定義。所謂的公平，並不是指大家待遇一樣，而是在制度上做到待遇與貢獻成正比例。

為甚麼要強調「制度上」？只有開誠佈公，讓所有客人及會員知道玩法，清楚了解晉升條件及福利，不是憑人為主觀條件，才可能正面吸引他們踏上這條天梯，對品牌更為忠誠，貢獻更多。

平等，是品牌承諾能為每一個顧客提供服務的一個最低標準；公平，是回報顧客支持，貢獻得多回報得多的做法。

所以說，不公平的待遇，對客人才是最公平。

如果你覺得好睇嘅，請給我1個掌聲作為鼓勵；
如果你想我再寫嘅，請給我2–5個掌聲作為鼓勵；

不公平待遇，對客人才最公平 was originally published in 潮童如是說 on Medium, where people are continuing the conversation by highlighting and responding to this story.