2018收視率回顧，最多人睇嘅係......?
Facebook 專頁有更多短文: https://www.facebook.com/ivanliresearch/
即管學下 置地記者，搞下呢個medium回顧，雖然搞完個Excel我已經發現係得個桔。留意返我第一篇文係4月2號寫的，剛好就寫9個月。
- 9個月以嚟，剛好90篇。一個月10篇，其實比我想像中多。
- 仲有一篇出過下咗架，費事惹麻煩。有一篇寫咗冇出，原因同上。好似有一兩篇起咗頭冇完到。
- 基本上係一個倒V型，開頭寫得多，六七月去到頂，然後就冇咁密了。
- 同置記一樣，寫得最多？六七月咯，世界盃嘛。事實啲世界盃文又其實幾啱medium寫。
- 最少？九月十月咯。辭咗工嘛。關乜事？首先返工寫文係最有效率嘅。另外，辭咗工去旅行嘛。去旅行仲寫medium 咁pathetic？
- 十月最少，三大篇。三篇都影評，仲要一套寫兩篇。九月都係三篇，但九月嗰三篇係我相當滿意，收視都不錯嘅。
- 最多view嘅文章，自己炒iPhone 然後鬧黃牛不公義係咩玩法？ ，常識之死： 日本人唔食三文刺身? 震驚億幾人呀 — 你大約睇到，都係多人關心，而比較另類見解嘅文。冇乜人小，或者有人小我唔知。似乎啲讀者嘅包容度比較高。呀仲有，呢兩篇文正係最早期嘅幾篇，作者越寫越差亦可能係原因
- 另外，過去20年，香港人供樓係越嚟越易 有1億仲玩半邊燒鵝髀？， 到底香港人份糧幾多拎去供樓？波叔一個數，人口普查一個數，金管又一個數 ，台灣人均GDP高過日本韓國？是真的，但點解？， 各種匯率機制，「不可能的三角」，外加歷史例子數個 呢幾篇都係高view的。而呢幾篇文全部都係講金融的，最尾兩篇甚至講明係技術文。
- 似乎作者自己置頂，或者經常回帶嘅文，都係冇乜特別顯著效果嘅。在公司上唔到位，點算？外加感人小故事數則， 香港進入3P年代 : 12年第一次加P，只加八份一厘 都係
- 票房毒藥嘅，有幾篇世界盃文都係。
- 付出回報最不相稱嘅，正係上一篇，金融時報十四個詞定義2018，你識幾多個？用咗不少時間譯／寫，最後都幾毒藥下
- 最本小利大嘅，有1億仲玩半邊燒鵝髀？ 實在唔使用乜時間寫，主要係搵返啲燒鵝相出嚟。其實 常識之死： 日本人唔食三文刺身? 震驚億幾人呀 都係。飲飲食食果然好。連篇 一百七十三蚊的下午餐-蔡瀾越南粉 都幾多人睇。不如我轉行啦。
- 但又奇怪，Fans最多嘅，係成日回帶嘅 香港進入3P年代 : 12年第一次加P，只加八份一厘。作者本人係覺得呢篇不錯的，但收視唔高，Fans就多。
- 四十大壽: 念念不忘，必有迴響 (長文慎入) 都係一篇 收視唔高，Fans就 嘅文，亦係作者滿意嘅。證明作者自己滿意嘅文 收視未必好，但同啲medium 讀者係同溫的。呢篇其實齋講自己，但又冇置記所講影響收視。
- 有個別文有其他媒體轉載，有啲有經我同意（例如體嘢 或者Tasty Money），有啲我都唔係好記得有冇同意（例如獨媒），但只要有返原文link我都冇乜所謂。但呢啲文亦不見得特別多咗人睇。唔知佢地失敗定我失敗。
- Read Ratio 方面，都係冇乜結論。有幾篇特高，但嗰幾篇都係極低收視嘅。
- 反而想講下Read ratio 最低嘅兩篇，台灣人均GDP高過日本韓國？是真的，但點解？ 同埋 蘋果和脫星：我希望大家多啲留意我演技，唔係睇我個胸。 前者的確寫得比較悶，冇法，相信啲友睇到一半唔睇。後者啦喎，多得朋友加持，篇文收視幾高。同埋加埋有張高海寧相。但又似乎大家入到去發現唔係講高海寧，唔睇。
展望？係冇嘅。其實真係有機會不停回帶嘅文我先放呢度。我在自己FB page好多文都比呢度收視高，亦有發現其實share 上FB Page嘅medium文普遍係唔多人睇嘅，可能因為我唔識揀summary，亦可能因為讀者唔想click 上 click-一次在 FB 幾千字反而有人睇
整體都係冇乜咩得著。當然見到寫足球係少人睇，我亦唔會好特定寫 — 你見世界盃後其實我都冇乜寫過。寫戲係少人睇嘅，正常，幾時都係。寫樓市係比較多人睇嘅。
不過講到尾，第個我唔知啦，我寫文，就梗係為自己過癮。所以都係以我本人過癮為先。反正好難討好讀者，幾時都係自己過癮咗先。就算出嚟畀人話打飛機，都自己爽咗。到你好委屈咁為咗討好讀者寫，然後出嚟一樣畀人小，就雙重打擊咯。
難聽講句，雖然我繼續開工不足，但慳慳地食埋下半世都應該仲得（咁就肯定冇得食204蚊早餐啦）。葉劉我唔鍾意，我估大家都唔鍾意，但當時有關林鄭，佢講過一句： 「你叫我返去跟個妹妹（林鄭），我真係老面皮放唔落囉。」。得罪講句，我有樓有老婆冇仔女有唔少fans，而家你先叫我去日日諗下點討好啲讀者？咪玩啦。唔好以為我唔虛榮唔介意人點睇，事實上我好撚虛榮好撚介意人點睇。嗰種想人賞識而明月照溝渠嘅心情，我受得多—所以而家希望唔好再受了。
Medium嘅界面其實有其好處，有啲比較技術嘅文真係幾適合，特別係多圖嘅文。但壞處亦講咗，難聽講句真係好似自己貼FB page好啲咁。同埋總係要揀兩張相（得一張出唔到preview），揀summary呢啲亦令我好抓狂
所以來年，都係咁上下，冇乜見到特別會加大或減少呢度產量。講到Facebook點唔得，但凈靠medium你更加食得屎。
係呀，寫咗咁多，都真係冇乜得著。我並冇由呢個2019收視報告學會任何嘢，你都應該冇。你浪費咗時間，我又浪費埋時間。但最吹脹係乜？我估呢篇嘅收視都會去到中游，好過好多我舊年好畀心機寫嘅文
寫文就係咁架啦。共勉之。
Facebook 專頁有更多短文: https://www.facebook.com/ivanliresearch/
